CSK विरुद्धच्या सामन्यापूर्वी मुंबई इंडियन्सची ताकद वाढली; T20 वर्ल्ड कप गाजवणारा ‘धाकड’ खेळाडू संघात दाखल

मुंबई: आयपीएल २०२६ मधील सर्वात मोठा आणि बहुप्रतीक्षित सामना २३ एप्रिल रोजी मुंबईच्या वानखेडे स्टेडियमवर रंगणार आहे. चेन्नई सुपर किंग्स (CSK) आणि मुंबई इंडियन्स (MI) या दोन कट्टर प्रतिस्पर्ध्यांमधील या लढतीपूर्वी मुंबईच्या गोटातून एक मोठी आणि आनंदाची बातमी समोर आली आहे. इंग्लंडचा स्फोटक अष्टपैलू खेळाडू विल जॅक्स अखेर मुंबई इंडियन्सच्या संघात सामील झाला असून, यामुळे चेन्नईविरुद्धच्या सामन्यात मुंबईचे पारडे जड झाले आहे.

दुखापतीतून सावरला ‘मॅच विनर’ खेळाडू

‘क्रिकबझ’ने दिलेल्या माहितीनुसार, विल जॅक्स आता पूर्णपणे तंदुरुस्त असून त्याने मुंबई इंडियन्सच्या कॅम्पमध्ये हजेरी लावली आहे. हंगामाच्या सुरुवातीला तो दुखापतग्रस्त असल्याने पहिल्या काही सामन्यांना मुकला होता. सोमवारी गुजरातविरुद्ध ९९ धावांनी मिळवलेल्या दणदणीत विजयानंतर मुंबईचा संघ सध्या फॉर्मात आहे. आता जॅक्सच्या पुनरागमनामुळे मुंबईची मधली फळी अधिक मजबूत झाली असून, तो फलंदाजीसोबतच आपल्या फिरकीने गोलंदाजीतही मोलाचे योगदान देऊ शकतो.

टी-२० वर्ल्ड कप २०२६ मधील ऐतिहासिक कामगिरी

विल जॅक्स सध्या आपल्या कारकिर्दीतील सर्वोत्तम फॉर्ममध्ये आहे. नुकत्याच झालेल्या टी-२० वर्ल्ड कप २०२६ मध्ये त्याने इंग्लंडला उपांत्य फेरीपर्यंत पोहोचवण्यात सिंहाचा वाटा उचलला होता.

• अनोखा विक्रम: जॅक्सने या विश्वचषकात सलग ४ सामन्यांमध्ये ‘प्लेअर ऑफ द मॅच’चा किताब जिंकून इतिहास रचला होता.

• फलंदाजी: ८ डावात ५६.५० च्या सरासरीने आणि १७६.५६ च्या स्ट्राइक रेटने २२६ धावा कुटल्या.

• गोलंदाजी: २१.६६ च्या सरासरीने ९ महत्त्वपूर्ण बळी घेतले.

आयपीएलमधील विल जॅक्सचा प्रवास

जॅक्ससाठी हा हंगाम अत्यंत महत्त्वाचा आहे. गेल्या हंगामातही तो मुंबई इंडियन्सचा भाग होता, जिथे त्याने १३ सामन्यांत ११ डावांत फलंदाजी करताना २३.३० च्या सरासरीने धावा केल्या होत्या आणि ६ बळी घेतले होते. त्यापूर्वी तो आरसीबीच्या ताफ्यातही होता. आतापर्यंतच्या २१ आयपीएल सामन्यांत त्याने १५२.८० च्या स्ट्राइक रेटने ४६३ धावा केल्या आहेत. जॅक्सचा सध्याचा फॉर्म पाहता, चेन्नईच्या फिरकीपटूंना रोखण्यासाठी हार्दिक पांड्या त्याला प्लेइंग इलेव्हनमध्ये संधी देतो का, हे पाहणे उत्सुकतेचे ठरेल.