आयपीएल २०२५ च्या ५२ व्या सामन्यात आरसीबी आणि सीएसके आमनेसामने येत आहेत. हा सामना एम चिन्नास्वामी स्टेडियमवर खेळला जात आहे. या सामन्यात विराट कोहलीने चमत्कार केला. त्याने आरसीबीसाठी शानदार अर्धशतकी खेळी केली. या सामन्यात विराट कोहलीने इतिहास रचला. तो टी-२० संघासाठी ३०० किंवा त्याहून अधिक षटकार मारणारा जगातील पहिला खेळाडू ठरला. याशिवाय कोहलीने ख्रिस गेलचा विक्रम मोडला. विराट कोहलीने ३३ चेंडूत ५ चौकार आणि ५ षटकारांच्या मदतीने ६२ धावांची शानदार खेळी केली.
विराट कोहलीने इतिहास रचला
टी-२० क्रिकेटमध्ये एकाच संघाकडून सर्वाधिक षटकार मारण्याचा विक्रम आता विराट कोहलीच्या नावावर आहे. त्याने रॉयल चॅलेंजर्स बंगळुरूसाठी हा पराक्रम केला आहे. या यादीत दुसऱ्या स्थानावर क्रिस गेल आहे, ज्याने आरसीबीसाठी २६३ षटकार मारले. तिसऱ्या क्रमांकावर मुंबई इंडियन्सचा रोहित शर्मा आहे, ज्याच्या नावावर २६२ षटकार आहेत. चौथ्या स्थानावर किरॉन पोलार्ड आहे, ज्याने मुंबई इंडियन्ससाठी २५८ षटकार मारले. पाचव्या क्रमांकावर एमएस धोनी आहे, ज्याने चेन्नई सुपर किंग्जसाठी एकूण २५७ षटकार मारले आहेत.
टी२० मध्ये एका संघासाठी सर्वाधिक षटकार
३०१ – विराट कोहली (आरसीबी)*
२६३ – ख्रिस गेल (आरसीबी)
२६२ – रोहित शर्मा (एमआय)
२५८ – किरॉन पोलार्ड (एमआय)
२५७ – एमएस धोनी (सीएसके)
विराट कोहलीने आणखी एक मोठा विक्रम आपल्या नावावर केला आहे. तो टी-२० क्रिकेटमध्ये एकाच मैदानावर सर्वाधिक षटकार मारणारा फलंदाज बनला आहे. त्याने एम. चिन्नास्वामी स्टेडियमवर हा विक्रम केला, जिथे आता त्याच्या नावावर १५४ षटकार आहेत. या बाबतीत त्याने ख्रिस गेलला मागे टाकले, ज्याने त्याच मैदानावर १५१ षटकार मारले होते.
विशेष म्हणजे, तिसऱ्या क्रमांकावर ख्रिस गेल आहे, ज्याने बांगलादेशातील मिरपूर मैदानावर १३८ षटकार मारले आहेत. चौथ्या स्थानावर इंग्लंडचा अ‍ॅलेक्स हेल्स आहे, ज्याने नॉटिंगहॅममध्ये १३५ षटकार मारले आहेत. पाचव्या क्रमांकावर भारताचा रोहित शर्मा आहे, ज्याच्या नावावर वानखेडे स्टेडियमवर १२२ षटकार आहेत.
टी२० मध्ये एकाच मैदानावर सर्वाधिक षटकार
१५४ – विराट कोहली, बंगळुरू
१५१ – ख्रिस गेल, बंगळुरू
१३८ – ख्रिस गेल, मिरपूर
१३५ – अ‍ॅलेक्स हेल्स, नॉटिंगहॅम
१२२– रोहित शर्मा, वानखेडे