आशिया चषक स्पर्धेतील टीम इंडियाचा प्रवास अंतिम फेरीत पोहोचण्याआधीच संपला, पण शेवटच्या सामन्यासाठी भारतीय संघ मैदानात उतरला, जिथे त्यांचा सामना अफगाणिस्तानशी सुरू आहे. या सामन्यात भारतासाठी काहीही साध्य झाले नसले तरी टीम इंडिया आणि त्याच्या चाहत्यांची, विशेषत: विराट कोहलीच्या चाहत्यांची सर्वात मोठी प्रतीक्षा संपली आहे – विराट कोहलीचे 71 वे शतक अखेर पूर्ण झाले आहे. कोहलीने अफगाणिस्तानविरुद्ध केवळ 53 चेंडूत आपल्या T20 आंतरराष्ट्रीय कारकिर्दीतील पहिले शतक झळकावले.
आशिया चषक सुरू होण्यापूर्वी फॉर्मबाबत सर्वाधिक प्रश्नांच्या भोवऱ्यात सापडलेल्या विराट कोहलीने या स्पर्धेत आपली मॅच बाय मॅच लय साधली आणि त्यानंतर 1021 दिवसांनी आंतरराष्ट्रीय क्रिकेटमधील पहिले शतक झळकावत हरवलेला फॉर्म पुन्हा मिळवला. कोहलीचा शतकाचा दुष्काळ, जो नोव्हेंबर 2019 पासून सुरू आहे तो आता संपला. बऱ्याच कालावधीनंतर विराट कोहलीच्या बॅटने आंतरराष्ट्रीय क्रिकेटमध्ये शतक झळकावले आहे. त्याने 61 चेंडूत नाबाद 122 धावा केल्या. आंतरराष्ट्रीय क्रिकेटमध्ये 1021 दिवसांनंतर त्याच्या बॅटमधून शतक झाले आहे. यापूर्वी कोहलीने नोव्हेंबर 2019 मध्ये बांगलादेशविरुद्धच्या डे-नाईट कसोटी सामन्यात शेवटचे शतक झळकावले होते.
There it is! 💯 for @imVkohli 👏👏
His first in T20Is and 71st in International Cricket.
Live – https://t.co/1UkuWxy3Ee #INDvAFG #AsiaCup2022 pic.twitter.com/2Yeakk1oLc
— BCCI (@BCCI) September 8, 2022
या शतकासह किंग कोहलीच्या नावावर T20 आंतरराष्ट्रीय क्रिकेटमध्ये 3584 धावा झाल्या आहेत. T20 आंतरराष्ट्रीय सामन्यांमध्ये सर्वाधिक धावा करण्याच्या बाबतीत मार्टिन गुप्टिलला मागे टाकून तो दुसऱ्या क्रमांकावर आला आहे. यासोबतच T20 आंतरराष्ट्रीय क्रिकेटमध्ये 3500 हून अधिक धावा करणारा तो दुसरा फलंदाज ठरला आहे.
विराट कोहली आंतरराष्ट्रीय T20 मध्ये सर्वाधिक 50+ धावा करणारा खेळाडू बनला आहे. त्याने या बाबतीत भारतीय कर्णधार रोहित शर्माला मागे टाकले आहे. रोहित शर्माने आंतरराष्ट्रीय T20 मध्ये 32 वेळा पन्नास धावांचा टप्पा ओलांडला आहे. त्याचवेळी विराट कोहलीने आज 33व्यांदा पन्नास धावांचा टप्पा पार केला. विशेष म्हणजे आशिया चषक 2022 मध्ये विराट कोहलीने आतापर्यंत तीनदा पन्नास धावांचा टप्पा ओलांडला आहे. तो भारतासाठी सर्वाधिक धावा करणारा खेळाडूही आहे.