Viral Video: मृत्यूशी गप्पा! कडाक्याच्या थंडीत विषारी कोब्रासोबत शेकोटी शेकत बसला तरुण; व्हिडिओ पाहून नेटकरी अवाक

व्हायरल
By Team Inside Marathi
WhatsApp Group

सापाचे नाव काढले तरी अनेकांच्या अंगावर काटा येतो, पण सोशल मीडियावर सध्या एक असा व्हिडिओ व्हायरल होत आहे जो पाहून तुमच्या डोळ्यांवर तुमचा विश्वास बसणार नाही. मध्य प्रदेशातील भिंड जिल्ह्यातून समोर आलेल्या या व्हिडिओमध्ये एक व्यक्ती चक्क एका महाभयंकर काळ्या कोब्रासोबत शेकोटी शेकताना दिसत आहे. केवळ शेकोटीच नाही, तर हा तरुण त्या सापाशी एखाद्या जुन्या मित्रासारख्या गप्पाही मारत आहे.

मृत्यूशी मैत्री की अजब वेड?

व्हायरल व्हिडिओमध्ये कडाक्याची थंडी असून एक व्यक्ती आग पेटवून बसलेली दिसत आहे. आश्चर्याची बाब म्हणजे, त्याच्या अगदी शेजारीच एक विषारी नाग फणा काढून बसला आहे. सामान्यतः साप दिसला की लोक जिवाच्या आकांताने पळ काढतात, पण इथे ना साप हल्ला करत आहे, ना त्या तरुणाच्या चेहऱ्यावर भीतीची एकही रेघ दिसत आहे. हा ‘डेअरडेविल’ तरुण कोब्राच्या डोळ्यात डोळे घालून चक्क संवाद साधत आहे.

“भावा चावू नकोस”, सापाशी अजब संवाद

या व्हिडिओचा सर्वात थरारक आणि मजेशीर भाग म्हणजे त्या तरुणाचे बोलणे. तो सापाला उद्देशून म्हणतो, “बघ भावा, मला चावू नकोस बरं का!” तो पुढे त्या नागाला आठवण करून देतो की, तो त्याला रस्त्याच्या कडेला भेटला होता आणि त्याला वाचवण्यासाठीच त्याने इथे आणले आहे. “आता शांतपणे आगीची ऊब घे आणि मजा कर,” असा सल्लाही तो त्या सापाला देतो. त्या तरुणाच्या बोलण्याला प्रतिसाद म्हणून नाग ज्या प्रकारे फणा हलवतो, ते पाहून तो जणू त्याचे बोलणे समजत असल्याचा भास होतो.

सोशल मीडियावर टीकेची झोड आणि भीतीचे वातावरण

हा व्हिडिओ इंटरनेटवर प्रचंड वेगाने पसरत असून त्यावर संमिश्र प्रतिक्रिया येत आहेत. काहींनी याला ‘अतुलनीय संवाद’ म्हटले असले, तरी बहुतांश नेटकऱ्यांनी याला जीवघेणा स्टंट ठरवले आहे. वन्यजीव प्रेमींच्या मते, वन्यप्राण्यांशी अशी जवळीक साधणे केवळ माणसासाठीच नाही तर प्राण्यांसाठीही धोकादायक ठरू शकते. सापाची नैसर्गिक प्रवृत्ती कधी बदलेल हे सांगता येत नाही, त्यामुळे असे धाडस करणे जीवावर बेतू शकते.