मुंबई : शिवसंग्रामचे नेते विनायक मेटे(Vinayak Mete) यांचं अपघाती निधन झालं आहे. मुंबई-पुणे द्रुतगती महामार्गावर (Mumbai Pune Express Highway) ही घटना घडली आहे. माडप बोगद्यामध्ये आज पहाटे साडेपाच वाजताच्या सुमारास विनायक मेटे यांच्या गाडीचा अपघात झाला होता. अपघातानंतर जवळपास एक तासभर मेटे यांना कुठलीही मदत मिळाली नव्हती. यानंतर मेटे यांना नवी मुंबईतील एमजीएम रुग्णालयामध्ये(Navi Mumbai MGM Hospital) दाखल करण्यात आलं होतं. मेटे यांच्यासह त्यांच्या बॉडीगार्ड आणि गाडी चालकाची प्रकृती गंभीर होती. दरम्यान उपचारादरम्यान मेटे यांचं निधन झालं असल्याची माहिती रुग्णालय प्रशासनानं दिली.
यावेळी मेटे यांचे सहकारी एकनाथ कदम हेदेखील त्यांच्यासोबत होते. त्यांनी या अपघाताबद्दल माहिती देताना सांगितलं, की एका ट्रकने कट मारल्यामुळे बीडकडून मुंबईकडे येताना मुंबई-पुणे एक्सप्रेसवर हा अपघात झाला. अपघातानंतर एक तास मदत मिळाली नाही. यानंतर 100 नंबरवर अनेकदा फोन केला. मात्र या नंबरवरील फोनही उचलला गेला नाही. मदतीसाठी अनेकदा कदम विनवणी करत होते. मात्र, कोणीही गाडी थांबवली नाही, अशी माहिती कदम यांच्याकडून देण्यात आली आहे.
मेटे यांच्या डोक्याला आणि हाताला गंभीर दुखापत झाली होती. मी जखमी झालो होतो. त्यामुळे रोडवर झोपलो होतो, आम्ही गाड्यांना हात दाखवत होतो मदत करण्याची विनवणी करत होतो. मग एका व्यक्तीने गाडी थांबवली आणि आम्हाला मदत केली. एका तासानंतर तिथं रुग्णवाहिका आली. अपघातानंतर मी मेटे यांच्याशी बोललो, तेव्हा ते माझ्याशी संवाद करत होते, असंही एकनाथ कदम यांनी सांगितलं