डोंगराळ राज्यांतील बर्फवृष्टीचा परिणाम मैदानी भागात दिसून येत आहे. उत्तर आणि मध्य भारतात थंडी वाढू लागली आहे. जम्मू-काश्मीर, हिमाचल प्रदेश, उत्तराखंड, दिल्ली, उत्तर प्रदेश, बिहार, झारखंड, मध्य प्रदेश, राजस्थानसह अनेक राज्यांमध्ये तापमानात घट नोंदवली जात आहे. थंडीच्या लाटेमुळे नागरिक त्रस्त झाले आहेत. हवामान खात्यानुसार, उत्तर भारतात थंडी वाढण्याची शक्यता आहे, तर दुसरीकडे दक्षिण भारतातील राज्यांमध्ये आजही पाऊस पडण्याची शक्यता आहे. दरम्यान, येत्या काही दिवसांत देशातील अनेक भागांत तापमानात अचानक घट होण्याची शक्यता हवामान खात्याने (IMD) वर्तवली आहे. हवामान खात्याच्या म्हणण्यानुसार, गिलगिट-बाल्टिस्तान, मुझफ्फराबाद, लडाख, जम्मू-काश्मीर, हिमाचल प्रदेश आणि उत्तराखंडच्या पर्वतांमध्ये बर्फवृष्टीसह पाऊस पडण्याची शक्यता आहे.
पर्वतांवरील बर्फवृष्टीचा परिणाम देशाच्या मैदानी भागात स्पष्टपणे दिसून येत आहे. दिल्ली-एनसीआर, उत्तर, मध्य भारतासह देशातील अनेक भागांमध्ये तापमानात सातत्याने घट नोंदवली जात आहे. पर्वतीय भागातून येणाऱ्या थंड वाऱ्यांनुसार पंजाब, हरियाणा, राजस्थान, मध्य प्रदेश, उत्तर प्रदेश, दिल्लीसह अनेक राज्यांमध्ये थंडी वाढली असून येत्या काही दिवसांत थंडी आणखी वाढण्याची शक्यता आहे.
हवामान विभागाने दिलेल्या माहितीनुसार, पुढील एका आठवड्यात दिल्ली-एनसीआरमध्ये किमान तापमान 8 अंश सेल्सिअसच्या आसपास राहील. या दरम्यान रात्री थंडी आणखी वाढणार आहे, तर दिवसा कडक उन्हामुळे नागरिकांना थंडीपासून दिलासा मिळणार आहे. तसेच, एमआयडीचे म्हणणे आहे की डिसेंबरच्या मध्यापर्यंत दिल्ली-एनसीआरमध्ये थंडीची लाट येऊ शकते. यासोबतच यंदाची थंडी आपले अनेक विक्रम मोडू शकते.
हवामान खात्याच्या म्हणण्यानुसार, कर्नाटक, तामिळनाडू, केरळ, अंदमान आणि निकोबार या राज्यांमध्ये पुढील काही दिवस हलक्या ते मुसळधार पावसाची शक्यता आहे. विशेष म्हणजे दक्षिण भारतातील अनेक भागात गेल्या अनेक दिवसांपासून सतत पाऊस पडत आहे. त्यामुळे या भागातही तापमानाचा पारा घसरला आहे.
दक्षिण अंदमान समुद्रात चक्रीवादळ निर्माण होण्याची अपेक्षा आहे. यामुळे 5 डिसेंबरच्या सुमारास आग्नेय बंगालचा उपसागर आणि लगतच्या दक्षिण अंदमान समुद्रावर कमी दाबाचे क्षेत्र तयार होण्याची शक्यता आहे. ते पश्चिम-वायव्येकडे सरकून केंद्रित होण्याची दाट शक्यता आहे. आग्नेय बंगालच्या उपसागरात पुढील ४८ तासांत दाब निर्माण होईल. त्यानंतर ते पश्चिम-वायव्य दिशेने सरकून 8 डिसेंबर रोजी तामिळनाडू-पुडुचेरी किनार्‍याजवळ पोहोचण्याची दाट शक्यता आहे.
खाजगी हवामान अंदाज एजन्सी स्कायमेट हवामानानुसार, अंदमान आणि निकोबार बेटांच्या दक्षिणेकडील भागांसह तामिळनाडू आणि दक्षिण आंध्र प्रदेश आणि दक्षिण कर्नाटकात काही ठिकाणी हलका ते मध्यम पाऊस पडण्याची शक्यता आहे.