ऑस्ट्रेलिया आणि पाकिस्तान यांच्यात तीन सामन्यांची कसोटी मालिका खेळवली जात आहे. मालिकेतील तिसरा आणि शेवटचा सामना सिडनी क्रिकेट मैदानावर (SCG) 03 जानेवारी 2024 पासून खेळवला जाईल. हा सामना सुरू होण्यापूर्वी ऑस्ट्रेलियन संघाने आपला संघ जाहीर केला आहे. संघात कोणताही बदल करण्याचा निर्णय त्यांनी आहे. या सामन्यानंतर ऑस्ट्रेलियन संघाचा एक खेळाडू कसोटी क्रिकेटमधून निवृत्त होणार आहे. तो खेळाडू दुसरा कोणी नसून डेव्हिड वॉर्नर आहे.
वॉर्नरची कसोटी कारकीर्द
ऑस्ट्रेलियाने जाहीर केलेल्या 13 खेळाडूंच्या संघात डेव्हिड वॉर्नरच्या नावाचाही समावेश आहे. वॉर्नरला आता घरच्या मैदानावर कसोटी क्रिकेटमधून निवृत्ती घेण्याची संधी आहे. त्याचबरोबर प्लेइंग 11 मध्ये वॉर्नरच्या नावाचाही समावेश होणार हे जवळपास निश्चित झाले आहे. वॉर्नर सध्याच्या काळातील सर्वोत्तम क्रिकेटपटूंपैकी एक आहे. 37 वर्षीय खेळाडूने 111 वेळा देशासाठी टेस्ट फॉर्मेट खेळला आहे. या कालावधीत वॉर्नरने एकूण 8695 धावांची नोंद केली आहे.
वॉर्नरच्या धावा 44.58 च्या सरासरीने आल्या आहेत आणि त्याने 26 शतके आणि 36 अर्धशतके झळकावली आहेत ज्यात पाकिस्तान विरुद्ध 335* च्या कारकिर्दीतील सर्वोत्तम कामगिरी आहे. न्यू साउथ वेल्समध्ये जन्मलेला फलंदाज ऑस्ट्रेलियासाठी कसोटीत सर्वाधिक धावा करणारा पाचव्या क्रमांकावर आहे, तो त्याचा सहकारी स्टीव्ह स्मिथ आणि माजी खेळाडू स्टीव्ह वॉ, अॅलन बॉर्डर आणि रिकी पाँटिंग यांच्या मागे आहे. निवड समितीचे अध्यक्ष जॉर्ज बेली पाकिस्तानला मालिकेत क्लीन स्वीप करण्यास उत्सुक आहेत आणि वॉर्नरने शेवटच्या कसोटी सामन्यात चमकदार कामगिरी करावी अशी त्यांची इच्छा आहे.
जॉर्ज बेली काय म्हणाला?
फॉक्स क्रिकेटने बेलीच्या हवाल्याने म्हटले आहे की राष्ट्रीय निवड समितीने मेलबर्न ते सिडनी हाच संघ कायम ठेवला आहे कारण आम्हाला कसोटी मालिका क्लीन स्वीप करायची आहे. डेव्हिड वॉर्नरचा शेवटचा कसोटी सामना आणि त्याच्या घरच्या मैदानावर त्याची अतुलनीय कारकीर्द साजरी करण्यासाठी आम्ही उत्सुक आहोत.
तिसऱ्या कसोटीसाठी ऑस्ट्रेलियाचा संघ
पॅट कमिन्स (कर्णधार), स्कॉट बोलँड, अॅलेक्स कॅरी (विकेटकीपर), कॅमेरॉन ग्रीन, जोश हेझलवूड, ट्रॅव्हिस हेड, उस्मान ख्वाजा, मार्नस लॅबुशेन, नॅथन लियॉन, मिचेल मार्श, स्टीव्ह स्मिथ, मिचेल स्टार्क, डेव्हिड वॉर्नर
– साईश परब