निवडणूक आयोगाने महाराष्ट्राचे मुख्यमंत्री एकनाथ शिंदे यांच्या नेतृत्वाखालील बाळासाहेबांची शिवसेना या गटाला निवडणूक चिन्ह वाटप केले आहे. शिंदे यांच्या पक्षाला ढाल-तलवार हे चिन्ह मिळाले आहे. त्यांनी मंगळवारी त्यांच्या पसंतीच्या तीन निवडणूक चिन्हांची यादी निवडणूक आयोगाकडे (EC) सादर केली होती. निवडणूक चिन्हासाठी पक्षाने सुरुवातीला सादर केलेली यादी आयोगाने फेटाळली होती. दरम्यान आता शिवसेनेच्या एकनाथ शिंदे कॅम्पला ‘दोन तलवारी आणि एक ढाल’ हे चिन्ह देण्यात आल्याचे निवडणूक आयोगाने सांगितले आहे.
3 नोव्हेंबर रोजी अंधेरी पूर्व विधानसभेच्या पोटनिवडणुकीत शिवसेना पक्षाचे नाव आणि चिन्ह वापरण्यास निवडणूक आयोगाने शनिवारी बंदी घातली होती – उद्धव ठाकरे यांच्या नेतृत्वाखालील गट आणि शिंदे यांच्या नेतृत्वाखालील गट – शिवसेनेच्या दोन्ही गटांना बंदी घातली होती. आयोगाने सोमवारी उद्धव ठाकरे यांच्या नेतृत्वाखालील शिवसेनेच्या गटाला ‘मशाल’ चिन्हाचे वाटप केले होते.
Election Commission of India allots the ‘Two Swords & Shield symbol’ to Eknath Shinde faction of Shiv Sena; they were allotted the name ‘Balasahebanchi ShivSena’ yesterday. pic.twitter.com/2Xi2C5TS4T
— ANI (@ANI) October 11, 2022
ठाकरे गटासाठी पक्षाचे नाव म्हणून ‘शिवसेना – उद्धव बाळासाहेब ठाकरे’ असे नाव देण्यात आले, तर एकनाथ शिंदे यांच्या गटाला ‘बाळासाहेबांची शिवसेना’ असे नाव देण्यात आले, परंतु शिंदे कॅम्पचे निवडणूक चिन्ह ‘त्रिशूल’, ‘गदा’ आणि ‘उगवता सूर्य’ नाकारण्यात आले होते. ठाकरे गटानेही निवडणूक चिन्ह म्हणून त्रिशूल आणि उगवत्या सूर्याचा उल्लेख केला होता. आयोगाने शिंदे यांच्या नेतृत्वाखालील गटाला मंगळवारी सकाळपर्यंत चिन्हांची नवीन यादी सादर करण्यास सांगितले होते. दरम्यान आज शिंदे गटाला चिन्ह देण्यात आलं आहे.