ठाणे – भिवंडी येथे वडपा परिसरामध्ये चारचाकी चालकाचा ताबा सुटल्यामुळे एक मोठा अपघात झाला आहे. या अपघातामध्ये एकूण 9 जण जखमी झाले आहेत तर त्यापैकी ५ जणांची प्रकृती गंभीर आहे. या ९ जखमींपैकी ४ जणांना भिवंडी शासकीय रुग्णालयामध्ये उपचारासाठी दाखल करण्यात आले आहे. तर इतर ५ जणांना कळवा येथील छत्रपती शिवाजी महाराज रुग्णालयामध्ये आणि मुंबई शासकीय रुग्णालयामध्ये उपचारासाठी पाठविण्यात आले आहे.
भिवंडीमधील वडपा परिसरामध्ये एका चारचाकी वाहन चालकाचा ताबा सुटल्यामुळे हा गंभीर अपघात घडला आहे. मुंबई नाशिक हायवे वर वडपा परिसरामध्ये रस्त्याने जात असताना एका कंटेनरच्या चालकाने सिग्नल न देता गाडी वळवली. त्यामुळे कंटेनरच्या मागच्या बाजूला असलेल्या एका चारचाकी चालकाचा वाहनावरील ताबा सुटला आणि तो डीवायडर ओलांडून रस्त्याच्या दुसऱ्या बाजूला म्हणजेच विरुद्ध दिशेला जाऊन वाहनांना धडकला.
या भीषण धडकेत चारचाकी वाहने २ वाहनांना धडक दिली त्यामध्ये१ रिक्षा आणि १ दुचाकीचा समावेश आहे. या घटनेमध्ये रिक्षेतील ७ जण आणि दुचाकीवरील २ जण असे तब्बल ९ जण जखमी झाले आहेत. त्यातील ५ जणांची प्रकृती गंभीर आहे..