आजच्याच दिवशी टीम इंडियाला मिळाला होता सर्वात यशस्वी कर्णधार, ज्याने बदलला क्रिकेटचा इतिहास
23 डिसेंबर हा दिवस भारतीय क्रिकेटच्या इतिहासातील अतिशय खास दिवस आहे. 18 वर्षांपूर्वी या दिवशी म्हणजेच 23 डिसेंबर रोजी अशा खेळाडूने आंतरराष्ट्रीय क्रिकेटमध्ये पहिले पाऊल ठेवले होते, ज्याने यशाच्या अशा गाथा रचल्या, ज्याचे प्रत्येक खेळाडूचे स्वप्न होते. पण, काही मोजकेच लोक तिथपर्यंत पोहोचू शकतात आणि या भारतीय खेळाडूने तिथपर्यंत मजल मारली आहे. महेंद्रसिंग धोनी असे या खेळाडूचे नाव असून त्याने 2004 मध्ये आजच्याच दिवशी आंतरराष्ट्रीय क्रिकेटमध्ये पदार्पण केले होते. त्याचे पदार्पण असे होते की क्वचितच कोणत्याही खेळाडूला लक्षात ठेवायला आवडेल. कारण, धोनी पहिल्याच सामन्यात धावबाद झाला होता. त्याला खातेही उघडता आले नाही. अशी सुरुवात करूनही धोनी चिकाटीने एकामागून एक यशाच्या पायऱ्या चढत गेला ही वेगळी गोष्ट. प्रथम खेळाडू म्हणून आपले स्थान पक्के केले आणि नंतर कर्णधारपदात यशाचा नवा इतिहास रचला. त्याच्या यशाबद्दल जाणून घेण्यापूर्वी, धोनीसोबतच्या पहिल्या आंतरराष्ट्रीय सामन्यात काय घडले ते जाणून घेऊया? तो कसा शून्यावर धावबाद झाला.
धोनीने 2004 मध्ये टीम इंडियाच्या बांगलादेश दौऱ्यावर खेळल्या गेलेल्या चितगाव वनडेमध्ये पदार्पण केले होते. तो अशा वेळी क्रीजवर आला जेव्हा भारताने 5 विकेट गमावल्या होत्या आणि 10 षटके खेळायला बाकी होती. त्याच्याकडून वेगवान धावा अपेक्षित होत्या. धोनीने डावखुरा फिरकी गोलंदाज मोहम्मद रफिकच्या पहिल्या चेंडूचा सामना केला आणि तो फाइन लेगच्या दिशेने खेळून एक धाव घेण्यासाठी धावला. पण, नॉन स्ट्रायकरच्या टोकाला उभ्या असलेल्या मोहम्मद कैफने त्याला थांबण्याचा इशारा केला. धोनी क्रीझच्या खूप पुढे गेला होता, तो परत येईपर्यंत क्षेत्ररक्षकाने चेंडू यष्टिरक्षक खालेद मसूदकडे दिला होता. त्यामुळे धोनी पहिल्याच चेंडूवर धावबाद झाला. तो हसला आणि मग पटकन पॅव्हेलियनमध्ये परतला.
चौथ्या एकदिवसीय सामन्यात धोनीने ठोकले होते शतक
धोनीचे इरादे मजबूत होते आणि त्याने आपल्या कारकिर्दीतील चौथ्या एकदिवसीय सामन्यात ते सिद्ध केले, जेव्हा त्याने विशाखापट्टणम येथे पाकिस्तानविरुद्ध धडाकेबाज शतक ठोकले. यानंतर धोनी यशाच्या पायऱ्या चढत राहिला. पुढच्या काही वर्षांत तो सर्वात मोठा मॅच फिनिशर बनला, एक अप्रतिम यष्टिरक्षक बनला, कर्णधारपदात त्याने अनेक यश संपादन केले. धोनीने आपल्या आंतरराष्ट्रीय कारकिर्दीत 16 शतके ठोकली आणि 17 हजारांहून अधिक धावा केल्या. यष्टिरक्षणाचे अनेक मोठे विक्रमही त्यांच्या नावावर होते.
धोनीने आपल्या आंतरराष्ट्रीय कारकिर्दीत 538 सामन्यांत 44.96 च्या सरासरीने 17266 धावा केल्या. धोनीने आपल्या आंतरराष्ट्रीय कारकिर्दीत 16 शतके आणि 108 अर्धशतके केली आहेत. धोनीने केवळ एक फलंदाज म्हणूनच नाही तर विकेटकीपिंगमध्येही आपले कौशल्य सिद्ध केले. धोनीने विकेटच्या मागे 829 बळी घेतले, ज्यामध्ये त्याने 634 झेल आणि 195 स्टंपिंग केले. धोनीने आपल्या कारकिर्दीत 23 वेळा सामनावीर ठरला आणि तो 7 वेळा मालिकावीर ठरला.
कर्णधारपदात धोनीची धमक
कर्णधारपदाच्या आघाडीवरही धोनीने आपली धमक दाखवली. एमएस धोनी हा जगातील एकमेव कर्णधार आहे ज्याने तीन आयसीसी ट्रॉफी जिंकल्या आहेत. धोनीने 2007 साली T20 विश्वचषक जिंकला होता. यानंतर त्याने 2011 च्या विश्वचषकात देशाला विश्वविजेते बनवले. 2013 मध्ये त्याच्या नेतृत्वाखाली टीम इंडियाने ICC चॅम्पियन्स ट्रॉफी जिंकली होती. धोनीने कर्णधार म्हणून 178 सामने जिंकले.