दहिवडी – ज्या मुलाला आयुष्यभर संभाळले त्या पोटच्या मुलाने स्वतःच्याच वृध्द पित्याचा कुराडीने घाव घालून खून केल्याची धक्कादायक घटना समोर आली आहे. या घटनेने माण तालुक्यामध्ये खळबळ माजली आहे. पांडुरंग बाबुराव सस्ते (वय ७० ) असे मृत व्यक्तीचे नाव आहे.
कासारवाडी (ता.माण ) येथील आरोपी मुलगा नटराज पांडुरंग सस्ते हा आपले वृध्द वडील पांडुरंग बाबुराव सस्ते यांच्यावर मला मटण का खाऊ घालत नाही म्हणून चिडला होता. शुक्रवारी सायंकाळी ४ वाजून ४५ मिनिटांच्या सुमारास कासारवाडी येथील स्वतःच्या मालकीच्या भंडारदरा मळवी या शिवारामध्ये पाठीमागून डोक्यावर व मानगुटीवर मुलगा नटराज यांने वडील पांडुरंग सस्ते यांच्यावर कुराडीने घाव घालून गंभीर जखमी केले. त्यानंतर ते जागीच रक्ताच्या थारोळ्यात मृत होऊन पडले.
ही घटना गावभर पसरताच सगळीकडे भीतीचे वातावरण निर्माण झाले होते. त्यानंतर चतुराबाई पांडुरंग सस्ते (वय ६० ) यांनी दहिवडी पोलीस ठाण्यात फिर्याद दाखल केली आहे. दहिवडी पोलिस ठाण्याचे पोलीस उपनिरीक्षक डी. डी. तुपे यांनी घटनास्थळाचा पंचनामा केला असून कलम ३०२ प्रमाणे गुन्हा दाखल करण्यात आला आहे. आरोपी नटराज सस्ते याला पोलिसांनी अटक केली आहे.