भारतीय जनता पक्षाला (भाजप) कर्नाटकमध्ये बजरंगबलीकडून मदत मिळाली नाही, त्यामुळे आता औरंगजेब आणि टिपू सुलतान यांसारख्या ऐतिहासिक व्यक्तींशी संबंधित मुद्दे उपस्थित करत आहेत, असे शिवसेनेचे (उद्धव बाळासाहेब ठाकरे) ज्येष्ठ नेते संजय राऊत यांनी गुरुवारी सांगितले. उद्धव ठाकरे यांच्या नेतृत्वाखालील पक्षाच्या स्थापना दिनाच्या कार्यक्रमाला संबोधित करताना, राज्यसभा सदस्य राऊत यांनी महाराष्ट्रातील जातीय हिंसाचाराच्या अलीकडील घटनांसाठी सत्ताधारी आघाडी भाजपला जबाबदार धरले.
‘भाजपला राजकारणासाठी औरंगजेब हवा’
ते म्हणाले, ‘औरंगजेबाची कबर महाराष्ट्रात आहे. औरंगजेबला इथेच दफन करण्यात आले… छत्रपती शिवाजी महाराजांच्या महाराष्ट्रात त्याला दफन करण्यात आले.” भाजपला राजकारणासाठी औरंगजेबाची गरज असल्याचा टोला त्यांनी लगावला. राऊत म्हणाले, “कर्नाटकात बजरंग बलीने त्यांना मदत केली नाही… त्यानंतर त्यांनी औरंगजेब, टिपू सुलतान, बहादूर शाह जफर, अफजल खान यांचा मुद्दा उपस्थित केला. भाजप त्यांना प्रसिद्धीच्या झोतात आणत आहे कारण त्यांना त्यांची गरज आहे.
औरंगजेबाच्या व्हॉट्सअॅप स्टेटसने वातावरण चिघळले
टिपू सुलतानच्या फोटोसह आक्षेपार्ह ऑडिओ संदेश सोशल मीडियावर ‘स्टेटस’ म्हणून काही स्थानिकांनी पोस्ट केल्याच्या विरोधात उजव्या विचारसरणीच्या संघटनांनी बुधवारी महाराष्ट्रातील कोल्हापुरात आंदोलन केले. राऊत म्हणाले, ‘उपमुख्यमंत्री देवेंद्र फडणवीस विचारतात की हे औरंगजेबाचे वंशज कुठून आले… हे तुमच्यामुळे (भाजप) झालेत.’ ते म्हणाले की, कोल्हापुरातील घटनांमध्ये बहुतांश लोक हे शहराबाहेरील आहेत.
मुख्यमंत्री एकनाथ शिंदे यांच्या नेतृत्वाखालील शिवसेनेच्या 16 आमदारांच्या अपात्रतेच्या प्रलंबित याचिकांवर राऊत म्हणाले की, विधानसभा अध्यक्ष राहुल नार्वेकर यांना ‘जल्लाद’ची भूमिका बजावावी लागेल. ते म्हणाले, “सुप्रीम कोर्टाने शिंदे सरकारला आधीच फाशीची शिक्षा सुनावली आहे. आता त्याची अंमलबजावणी करण्यासाठी जल्लादाची गरज आहे. हा मुद्दा पुन्हा महाराष्ट्र विधानसभेत आला आहे. आता सभापतींना जल्लादाची भूमिका बजावावी लागेल.” दरम्यान, राऊत यांनी त्यांच्या पक्षाच्या स्थानिक नेत्यांना कार्यक्रमाला कमी उपस्थितीबद्दल फटकारले.