आयपीएल २०२६ मध्ये आधीच संकटात असलेल्या मुंबई इंडियन्सच्या अडचणीत आता मोठी भर पडली आहे. संघाचा सर्वात अनुभवी आणि फॉर्मात असलेला फलंदाज रोहित शर्मा दुखापतीमुळे आगामी सामन्यातून बाहेर झाला आहे. मुंबई इंडियन्सला गुरुवारी, १६ एप्रिल रोजी पंजाब किंग्सविरुद्ध लढा द्यायचा आहे, मात्र त्याआधी रोहितच्या अनुपस्थितीने संघ व्यवस्थापनाची झोप उडवली आहे.
‘हॅमस्ट्रिंग’ने वाढवली मुंबईची चिंता
आरसीबीविरुद्धच्या गेल्या सामन्यात फलंदाजी करत असताना रोहित शर्माला ‘हॅमस्ट्रिंग’चा त्रास जाणवला होता. यामुळे तो आपली फलंदाजी पूर्ण करू शकला नव्हता आणि त्याला ‘रिटायर्ड हर्ट’ होऊन मैदान सोडावे लागले होते. तो पुन्हा फलंदाजीला न आल्याने मुंबईला त्या सामन्यात पराभवाचा सामना करावा लागला. ‘क्रिकबझ’ने दिलेल्या वृत्तानुसार, रोहितची प्रकृती अद्याप पूर्णपणे ठीक नसल्याने तो पंजाबविरुद्ध वानखेडे स्टेडियमवर होणाऱ्या सामन्यात खेळू शकणार नाही.
शानदार फॉर्ममध्ये होता ‘हिटमॅन’
रोहित शर्माने या मोसमात मुंबईसाठी सर्वाधिक धावा केल्या आहेत. पहिल्या सामन्यात केकेआरविरुद्ध त्याने ७८ धावांची तुफानी खेळी केली होती. त्यानंतर दिल्लीविरुद्ध ३५ आणि आरसीबीविरुद्ध नाबाद १९ धावा करत त्याने आपली लय कायम राखली होती. ४ सामन्यात ४५.६६ च्या सरासरीने १३७ धावा करणाऱ्या रोहितचे अचानक बाहेर जाणे मुंबईसाठी मोठा फटका मानला जात आहे.
मुंबई इंडियन्सची अवस्था बिकट
मुंबई इंडियन्सने या मोसमात आतापर्यंत ४ सामने खेळले असून त्यापैकी केवळ १ सामन्यात विजय मिळवला आहे, तर ३ सामन्यात त्यांना पराभवाचे तोंड पाहावे लागले आहे. १६.३० कोटी रुपयांना रिटेन केलेला रोहित शर्मा मैदानाबाहेर गेल्यामुळे आता सलामीच्या जोडीत बदल करावा लागणार आहे. वानखेडेच्या घरच्या मैदानावर पंजाबविरुद्ध विजय मिळवून पुनरागमन करण्याचे मुंबईचे स्वप्न आता रोहितविना पूर्ण करणे आव्हानात्मक ठरेल.