Rohit Sharma Record : रोहित शर्माने मोडला मार्टिन गुप्टिलचा ‘हा’ विक्रम, आफ्रिदीलाही टाकलं मागे

India vs Sri lanka Asia Cup 2022: आशिया चषक 2022 चा सुपर फोर सामना भारत आणि श्रीलंका यांच्यात दुबईत खेळला जात आहे. या सामन्यात टीम इंडिया प्रथम फलंदाजीसाठी मैदानात उतरली. भारतीय कर्णधार रोहित शर्माने या काळात धमाकेदार फलंदाजी करताना अनेक विक्रम मोडीत काढले. रोहितने 41 चेंडूत 72 धावा केल्या. त्याच्या खेळीत 5 चौकार आणि 4 षटकारांचा समावेश होता. रोहितने आपल्या खेळीदरम्यान षटकारांचा विक्रम मोडला.

रोहितने श्रीलंकेविरुद्ध स्फोटक फलंदाजी करताना षटकारांचा विक्रम मोडला. प्रथम फलंदाजी करताना सर्वाधिक षटकार मारण्याच्या बाबतीत रोहित शर्मा अव्वल स्थानी पोहोचला आहे. त्याने मार्टिन गुप्टिलला टी-20 आंतरराष्ट्रीय फॉरमॅटमध्ये मागे टाकले आहे. रोहितने टी-20 मध्ये आतापर्यंत102 षटकार ठोकले आहेत. तर गुप्टिल 101 षटकारांसह दुसऱ्या स्थानावर आहे. या यादीत कॉलिन मुनरो तिसऱ्या स्थानावर आहे.

रोहितने शाहिद आफ्रिदीचाही रेकॉर्ड मोडला आहे. तो आता आशिया कपमध्ये सर्वाधिक षटकार मारणारा फलंदाज बनला आहे. रोहितने एकूण 27 षटकार ठोकले आहेत. तर आफ्रिदीने 26 षटकार ठोकले आहेत. या यादीत श्रीलंकेचा माजी खेळाडू सनथ जयसूर्या तिसऱ्या क्रमांकावर आहे. त्याने 23 षटकार मारले आहेत. भारताचे माजी खेळाडू महेंद्रसिंग धोनी आणि सुरेश रैना 18-18 षटकारांसह चौथ्या स्थानावर आहेत.