Realme P4x 5G: 2 दिवस चालणारी बॅटरी! 7000mAh चा नवा स्मार्टफोन, कॅमेरा आणि परफॉर्मन्सची संपूर्ण माहिती वाचा

रियलमीने या वर्षात अनेक किफायतशीर स्मार्टफोन बाजारात आणले आहेत आणि या मालिकेतला त्यांचा नवा फोन Realme P4x 5G नुकताच भारतीय बाजारपेठेत दाखल झाला आहे. ७०००mAh च्या महाकाय बॅटरीसह आलेला हा स्मार्टफोन, बजेट-फ्रेंडली असूनही आकर्षक डिझाइन आणि दमदार फिचर्सने सुसज्ज आहे. आम्ही काही दिवस या फोनचा वापर करून पाहिला आणि या नवीन बजेट हिरोबद्दल आमचा अनुभव तुमच्यासाठी घेऊन आलो आहोत.

आकर्षक किंमत

Realme P4x 5G तीन स्टोरेज पर्यायांमध्ये उपलब्ध आहे:

६GB RAM + १२८GB स्टोरेज: ₹१५,४९९

८GB RAM + १२८GB स्टोरेज: ₹१६,९९९

८GB RAM + २५६GB स्टोरेज: ₹१७,९९९

हा फोन मॅट सिल्वर, एलिगंट पिंक आणि लेक ग्रीन अशा तीन आकर्षक रंगांमध्ये उपलब्ध आहे. आम्ही ८GB RAM आणि १२८GB स्टोरेज असलेला एलिगंट पिंक व्हेरियंट वापरला. किंमत पाहता, रियलमीने हा फोन मिड-बजेट सेगमेंटमध्ये एक मजबूत पर्याय म्हणून सादर केला आहे.

सॅमसंग-प्रेरित डिझाइन
Realme P4x 5G चे डिझाइन काहीसे सॅमसंगच्या अलीकडील फोन्सची आठवण करून देते. फोनच्या मागील बाजूस उभा (Vertical) कॅमेरा मॉड्यूल देण्यात आला आहे. कंपनीने फोनच्या बॉडीसाठी टिकाऊ प्लास्टिकचा वापर केला आहे. बॅक पॅनलची फिनिशिंग उत्कृष्ट आहे, ज्यामुळे फोन हातात व्यवस्थित पकडता येतो (ग्रिप). बॉक्समध्ये कव्हरही मिळत असल्याने अतिरिक्त संरक्षणाची चिंता मिटते.

या बजेट फोनमध्ये फ्लॅट डिस्प्ले आणि अत्यंत पातळ बेझल्स (bezel) देण्यात आले आहेत. खालच्या बाजूला USB Type C चार्जिंग पोर्ट, स्पीकर ग्रिल आणि सिम कार्ड स्लॉट आहेत, तर वरच्या बाजूला मायक्रोफोन आहे. बाजूला व्हॉल्यूम बटणे आणि पॉवर बटण आहेत, ज्यामध्येच फिजिकल फिंगरप्रिंट सेन्सर समाविष्ट केला आहे. एकूणच, या किंमतीनुसार Realme P4x 5G चे डिझाइन अतिशय छान आणि प्रीमियम फील देणारे आहे.

व्ह्यूइंगचा उत्कृष्ट अनुभव देणारा डिस्प्ले
या स्मार्टफोनमध्ये ६.७२ इंचाचा फ्लॅट LCD डिस्प्ले आहे, जो FHD+ (फुल एचडी प्लस) रिझोल्यूशनला सपोर्ट करतो. यात 144Hz चा हाय रिफ्रेश रेट मिळतो आणि पीक ब्राइटनेस १००० निट्सपर्यंत आहे. विशेष म्हणजे, एलसीडी पॅनेल असूनही, डिस्प्लेची क्वालिटी चांगली आहे.

व्हिडिओ पाहणे असो वा कंटेट वाचणे, व्ह्यूइंग अनुभव चांगला मिळतो. गेमिंगमध्येही हाय-डेफिनिशन ग्राफिक्सचा अनुभव घेता येतो. थेट सूर्यप्रकाशातही डिस्प्लेवरील मजकूर सहज वाचता येतो, जी एलसीडी डिस्प्ले असलेल्या फोन्समध्ये सहसा एक समस्या असते. या डिस्प्लेमुळे फोन मल्टीमीडिया वापरासाठी एक चांगला पर्याय ठरतो.
परफॉर्मन्स आणि ऑपरेटिंग सिस्टीम: पॉवरफुल प्रोसेसर
Realme P4x 5G मध्ये लेटेस्ट MediaTek Dimensity 7400 Ultra प्रोसेसर देण्यात आला आहे, जो दैनंदिन वापरासाठी उत्कृष्ट परफॉर्मन्स देतो. ८GB पर्यंत RAM आणि २५६GB पर्यंत इंटर्नल स्टोरेजमुळे, अनेक ॲप्स एकाच वेळी ओपन असतानाही फोन हँग होण्याची समस्या जाणवत नाही.

गेमिंग करतानाही फोनचा परफॉर्मन्स स्थिर राहतो, लॅग होत नाही. मात्र, जास्त ग्राफिक्स असलेले गेम अधिक काळ खेळल्यास फोनचा बॅक पॅनल थोडा गरम होऊ शकतो. ॲप्समध्ये स्विच करतानाही वेग कायम राहतो.

ऑपरेटिंग सिस्टीमबद्दल बोलायचं झाल्यास, यात Android 15 वर आधारित Realme UI 6.0 मिळते. हे युजर इंटरफेस युजर-फ्रेंडली आहे, पण यात अनेक प्री-इंस्टॉल्ड ॲप्स (ब्लॉटवेअर) दिलेले आहेत, जे युजरला निराश करू शकतात. मात्र, यामध्ये Google Gemini-आधारित AI स्मार्ट रिमूव्हल टूल, AI स्मार्ट लूप आणि AI नाईट व्हिजन मोडसारखे अनेक नवीन AI फिचर्स मिळतात. AI स्मार्ट रिमूव्हल टूलमुळे फोटोमधील अनावश्यक वस्तू सहजपणे काढता येतात, ज्यामुळे एडिटिंग सोपी होते.

बॅटरी बॅकअप: दोन दिवसांची चिंता मिटली
या फोनचे सर्वात मोठे वैशिष्ट्य म्हणजे त्याची ७०००mAh ची महाकाय बॅटरी. फोनसोबत 45W चा सुपरफास्ट चार्जर मिळतो. या बॅटरीमुळे, एकदा पूर्ण चार्ज केल्यावर फोनचा वापर दोन दिवसांपर्यंत आरामात करता येतो. गेमिंग किंवा वेब सिरीज पाहतानाही बॅटरी दिवसभर टिकते. फोन पूर्ण चार्ज होण्यासाठी अंदाजे ५० ते ५५ मिनिटे लागतात. केवळ १० मिनिटे चार्ज करूनही हा फोन दिवसभर वापरता येतो, इतका दमदार बॅटरी बॅकअप यात मिळतो.

कॅमेरा: बजेटनुसार समाधानकारक
कॅमेऱ्यासाठी, Realme P4x 5G मध्ये मागील बाजूस ५०MP चा मुख्य कॅमेरा आणि २MP चा मॅक्रो कॅमेरा असे ड्युअल कॅमेरा सेटअप दिले आहे. सेल्फी आणि व्हिडिओ कॉलिंगसाठी ८MP चा फ्रंट कॅमेरा मिळतो. किंमतीनुसार कॅमेरा सेटअप चांगला आहे.

दिवसाच्या प्रकाशात मुख्य कॅमेऱ्याने स्पष्ट फोटो क्लिक करता येतात. AI फिचरमुळे कमी प्रकाशातही चांगली छायाचित्रे घेता येतात. यात AI नाईट व्हिजन फिचर आहे, जे कमी प्रकाशातील फोटोची गुणवत्ता सुधारते. मात्र, कमी प्रकाशातील फोटो अजून चांगले असू शकले असते. फ्रंट कॅमेरा ठीक-ठाक आहे. पोर्ट्रेट मोडमध्ये बॅकग्राउंड ब्लर करण्याचे नियंत्रण युजरला मिळते. एकूणच, या किंमत श्रेणीत कॅमेरा परफॉरमन्स समाधानकारक आहे.

Realme P4x 5G हा स्मार्टफोन आकर्षक लुक, दमदार बॅटरी, चांगला डिस्प्ले आणि रोजच्या वापरासाठी उत्तम परफॉर्मन्सचा संगम आहे. यात थोडे ब्लॉटवेअर (प्री-इंस्टॉल्ड ॲप्स) आहेत, जे सेटअप करताना वगळावे लागतील. सुमारे एक आठवडा वापरल्यानंतर, आम्हाला हा फोन वापरण्यास सोपा आणि कोणत्याही समस्येशिवाय चालणारा वाटला. या किंमत श्रेणीतील इतर फोन्सच्या तुलनेत Realme P4x 5G निश्चितपणे पैसे वसूल (Value for Money) ठरू शकतो.