गर्भधारणेची इच्छा असणाऱ्या अनेक महिलांना आणि जोडप्यांना एक सामान्य प्रश्न पडतो — संभोगानंतर विशिष्ट गोष्टी करणं किंवा न करणं खरंच गर्भधारणेसाठी गरजेचं आहे का?
उदाहरणार्थ पाय वर ठेवणं, लगेच उठणं टाळणं, विशिष्ट स्थितीत झोपणं अशा अनेक गोष्टी प्रचलित आहेत. पण या गोष्टींचा खरोखर फायदा होतो का? की या फक्त चुकीच्या समजुती आहेत? यावर वैद्यकीय दृष्टिकोनातून स्पष्ट माहिती जाणून घेऊया.
गर्भधारणेच्या प्रक्रियेमध्ये काय घडतं?
संभोगावेळी पुरुषाच्या वीर्यात लाखो शुक्राणू असतात.
या शुक्राणूंमध्ये फक्त एकच शुक्राणू स्त्रीच्या अंडाणूपर्यंत पोहोचून त्याचं फलन करतो.
हे शुक्राणू अतिशय जलद गतीने स्त्रीच्या गर्भाशयाच्या दिशेने जातात — संभोगानंतर काही मिनिटांतच ते गर्भाशयात पोहोचू शकतात.
त्यामुळे, शारीरिक हालचाली किंवा विशिष्ट स्थिती यांचा त्यांच्यावर फारसा परिणाम होत नाही.
पाय वर ठेवणं किंवा विश्रांती घेणं — डॉक्टरांचं मत काय?
काही डॉक्टर सांगतात की, संभोगानंतर १०-१५ मिनिटं सरळ झोपणं हे फायदेशीर ठरू शकतं कारण त्यामुळे शुक्राणूंना गती पकडायला वेळ मिळतो.
मात्र, पाय वर ठेवणं किंवा विशिष्ट अवस्थेत झोपणं याला कोणताही वैज्ञानिक आधार नाही.
हा प्रकार केवळ मानसिक समाधानासाठी केला जातो. वास्तविक गर्भधारणेवर याचा फारसा परिणाम नसतो.
गर्भधारणेसाठी हे महत्वाचं
ओव्ह्युलेशन काळात संभोग करणं:
महिलांचा मासिक पाळी चक्राचा मधला काळ म्हणजे अंडोत्सर्जनाचा काळ असतो, जेव्हा गर्भधारणेची शक्यता जास्त असते.
दुहेरी आरोग्य लक्षात घेणं:
स्त्री आणि पुरुष दोघांचं आरोग्य उत्तम असणं आवश्यक आहे.
तणावमुक्त राहणं:
जास्त मानसिक दबाव किंवा चिंता असल्यास गर्भधारणेवर परिणाम होऊ शकतो.
तज्ज्ञ डॉक्टरांचा सल्ला घेणं:
गर्भधारणा लांबत असल्यास तज्ज्ञ वैद्यकीय सल्ला घेणं योग्य आहे.
गर्भधारणेसाठी संभोगानंतर ‘हे’ करणं गरजेचं आहे का?
गर्भधारणेसाठी संभोगानंतर पाय वर ठेवणं, व विशिष्ट स्थितीत झोपणं ही केवळ लोकश्रद्धा आहे, त्यामागे कोणताही ठोस वैज्ञानिक आधार नाही.
मात्र, काही वेळ विश्रांती घेतल्याने व लगेच हालचाल न केल्याने मानसिक समाधान मिळू शकतं — याचा अप्रत्यक्ष फायदा होतो.
गर्भधरणा होण्यासाठी मुख्यत्वे योग्य वेळ, दोघांचं आरोग्य व तज्ज्ञांचा सल्ला महत्त्वाचा असतो.
टीप:
हा लेख सामान्य माहितीवर आधारित असून, तुमच्या शारीरिक स्थितीनुसार डॉक्टरांचा सल्ला घेणं आवश्यक आहे.