Philippines Earthquake: फिलीपिन्स हादरला! 6.7 रिश्टर स्केलचा भूकंप; 31 जणांचा मृत्यू, अनेकजण जखमी

फिलीपिन्समध्ये मंगळवारी रात्री झालेल्या ६.७ रिश्टर स्केलच्या भूकंपामुळे मोठ्या प्रमाणात विध्वंस झाला आहे. सेबू प्रांत हादरला असून आतापर्यंत ३१ जणांचा मृत्यू झाल्याची पुष्टी झाली आहे. अनेकजण जखमी झाले असून काही ठिकाणी लोक ढिगाऱ्याखाली अडकले असण्याची भीती व्यक्त केली जात आहे.

चर्च आणि घरांचे नुकसान

भूकंप इतका तीव्र होता की दानबंतायनमधील चर्चचे नुकसान झाले आणि अनेक भागात वीजपुरवठा खंडित झाला. लोक भीतीने घरे सोडून रस्त्यावर धावत आले. पॅसिफिक महासागराच्या “रिंग ऑफ फायर”मध्ये असल्यामुळे फिलीपिन्समध्ये वारंवार भूकंप आणि ज्वालामुखीचे संकट उद्भवते.

सेबूत सर्वाधिक हानी

भूकंपाचे केंद्र सेबू प्रांतातील बोगो शहरापासून १७ किलोमीटर ईशान्येस होते. बोगो शहरात किमान १४ रहिवाशांचा मृत्यू झाला आहे. आपत्ती प्रतिसाद अधिकारी रेक्स यागोट यांनी सांगितले की, डोंगराळ भागात भूस्खलन व दगडफेकीमुळे बचावकार्य कठीण झाले आहे. यंत्रसामग्री पोहोचवण्यासाठी मोठे आव्हान उभे ठाकले आहे.

मेडेलिनमध्ये १२ जणांचा मृत्यू

शहराच्या आपत्ती व्यवस्थापन प्रमुख जेम्मा विलामोर यांनी सांगितले की, बोगोजवळील मेडेलिन शहरात किमान १२ जणांचा मृत्यू झाला आहे. अनेकजण झोपेत असताना घरांची छते व भिंती कोसळल्याने मृत्युमुखी पडले. जखमींना उपचारासाठी रुग्णालयात दाखल करण्यात आले आहे.

फिलीपिन्स इन्स्टिट्यूट ऑफ ज्वालामुखी आणि भूकंपशास्त्राने लोकांना सेबू, लेयटे आणि बिलिरन प्रांतातील किनारी भागांपासून दूर राहण्याचा सल्ला दिला आहे. आफ्टरशॉक्सची शक्यता लक्षात घेता नागरिकांना सतर्क राहण्याचे आवाहन केले गेले आहे.

लक्षात घेण्यासारखी बाब म्हणजे, या भूकंपाच्या काही दिवस आधीच फिलीपिन्सवर टायफून बुआलोईने हल्ला चढवला होता. या हल्ल्यात २७ जणांचा मृत्यू झाला होता. वादळामुळे वीजपुरवठा ठप्प झाला होता आणि हजारो नागरिकांना सुरक्षित स्थळी हलवावे लागले होते. या पार्श्वभूमीवर भूकंपामुळे नागरिकांवर दुहेरी संकट कोसळले आहे.

सध्या बचावपथके रात्रंदिवस कार्यरत आहेत. प्रशासनाने मृतांचा आकडा आणखी वाढू शकतो, अशी शक्यता वर्तवली आहे.