सरहद्द ओलांडून आलेलं प्रेम! 15 वर्षांची प्रतीक्षा संपली; पाकिस्तानची डॉक्टर सून जोधपूरच्या सासरी दाखल

जोधपूर: भारत आणि पाकिस्तानमधील तणावाच्या भिंती ओलांडून अखेर प्रेमाचा विजय झाला आहे. गेल्या १५ वर्षांपासून सुरू असलेला एक प्रदीर्घ संघर्ष, विसाची प्रतीक्षा आणि दोन्ही देशांमधील कायदेशीर पेच सोडून पाकिस्तानची डॉक्टर सून, रक्षा सुथार हिचे जोधपूरमधील सासरी सोमवारी अत्यंत थाटामाटात स्वागत करण्यात आले. सॉफ्टवेअर इंजिनिअर अमित सुथार आणि डॉ. रक्षा यांची ही कहाणी एखाद्या चित्रपटालाही लाजवेल अशी आहे.

१५ वर्षांचा वनवास आणि सीमेपलीकडचा साखरपुडा

अमित आणि रक्षा यांच्या नात्याची वीण २०११ पूर्वीच पाकिस्तानमध्ये विणली गेली होती. अमितच्या आजोबांनी त्यांचे लग्न ठरवले होते. मात्र, २०११ मध्ये अमितचे वडील प्रदीप सुथार आपल्या कुटुंबासह चांगल्या भविष्याच्या शोधात पाकिस्तान सोडून भारतात (जोधपूर) स्थायिक झाले. अमित भारतात आला खरा, पण त्याची मंगेतर रक्षा सीमेच्या पलीकडेच राहिली. यानंतर सुरू झाला तो व्हिसा मिळवण्याचा एक न संपणारा संघर्ष. अमितने भारतात आपले शिक्षण पूर्ण करून सॉफ्टवेअर इंजिनिअर म्हणून करिअर घडवले, तर रक्षाने पाकिस्तानात एमबीबीएसची पदवी घेतली.

नेपाळमध्ये पार पडला विवाह सोहळा

दोन्ही देशांमधील संबंधांमुळे थेट व्हिसा मिळवणे कठीण झाले होते. अनेक प्रयत्न अयशस्वी ठरल्यानंतर, दोन्ही कुटुंबांनी एक मधला मार्ग काढला. अखेर २ जून २०२५ रोजी नेपाळच्या काठमांडूमध्ये या जोडप्याने सात फेरे घेतले. मात्र, लग्नानंतरही रक्षाला लगेच भारतात येता आले नाही. नियमांनुसार, अमितला जोधपूरला आणि रक्षाला पुन्हा पाकिस्तानला परतावे लागले. लग्नानंतरची ही १० महिन्यांची जुदाई दोघांसाठी अत्यंत वेदनादायक होती.

गृहमंत्र्यांच्या हस्तक्षेपानंतर अखेर व्हिसा मिळाला

लग्नानंतर रक्षाला भारतात आणण्यासाठी कागदपत्रांची मोठी प्रक्रिया पार पाडावी लागली. अखेर केंद्रीय गृहमंत्री अमित शाह आणि केंद्रीय मंत्री गजेंद्र सिंह शेखावत यांच्या हस्तक्षेपानंतर रक्षाला ४५ दिवसांचा व्हिजिटर व्हिसा मंजूर झाला. जोधपूरच्या पाल भागात रक्षाचे आगमन होताच सुथार कुटुंबाच्या आनंदाला पारावार उरला नाही. सासरच्या मंडळींनी अक्षता टाकून आणि औक्षण करून आपल्या ‘डॉक्टर’ सुनेचे स्वागत केले, तेव्हा अनेकांच्या डोळ्यांत आनंदाश्रू तरळले.

पुढील वाटचाल: दीर्घकालीन व्हिसासाठी प्रयत्न

रक्षा सध्या व्हिजिटर व्हिसावर भारतात आली असली तरी, लवकरच तिच्यासाठी ‘लॉन्ग टर्म व्हिसा’ (LTV) मिळवण्याची प्रक्रिया सुरू केली जाणार आहे. यामुळे तिला कायमस्वरूपी भारतात राहता येईल आणि ती तिची वैद्यकीय सेवा येथे देऊ शकेल.