Viral Video: वय वर्ष 73, पण जिद्द अवकाशाची! पॅराग्लाइडिंग करणाऱ्या आजींचा व्हिडिओ व्हायरल; म्हणाल्या, ‘मस्त वाटतंय!’
जिद्द आणि काहीतरी करून दाखवण्याची ओढ असेल तर वयाचं बंधन कधीच आड येत नाही. हेच सिद्ध करून दाखवलंय एका ७३ वर्षीय आजींनी. ज्या वयात अनेकजण गुडघेदुखी किंवा चालताना होणाऱ्या त्रासाची तक्रार करतात, त्या वयात या आजींनी चक्क आकाशाला गवसणी घातली आहे. हिमाचल प्रदेशातील बीर बिलिंगच्या उंच पहाडांवरून त्यांनी पॅराग्लाइडिंग करत तरुणांनाही लाजवेल असा उत्साह दाखवला आहे.
वयाला विसरायला लावणारा उत्साह
सोशल मीडियावर सध्या या आजींच्या साहसाचा व्हिडिओ तुफान व्हायरल होत आहे. या व्हिडिओमध्ये पॅराग्लाइडिंग इन्स्ट्रक्टर अरुण सिंह जेव्हा आजींना त्यांचं वय विचारतात, तेव्हा त्या अत्यंत अभिमानाने ‘७३ वर्ष’ असं सांगतात. विशेष म्हणजे, इतक्या उंचावरून उडताना त्यांच्या चेहऱ्यावर भीतीचा लवलेशही नव्हता. उलट, एक निरागस हास्य आणि काहीतरी नवीन अनुभवण्याचा आनंद त्यांच्या चेहऱ्यावर स्पष्ट दिसत होता.
View this post on Instagram
आकाशात उडतानाचा ‘मस्त’ अनुभव
हवामध्ये उडत असताना जेव्हा इन्स्ट्रक्टरने विचारलं की, “आता कसं वाटतंय?“, तेव्हा आजींनी एका क्षणाचाही विलंब न लावता उत्तर दिलं, “मस्त वाटतंय!“. आजींनी पुढे सांगितलं की, त्यांनी यापूर्वी मसुरीमध्येही पॅराग्लाइडिंगचा आनंद लुटला आहे, पण बीर बिलिंगचा हा अनुभव त्यांच्यासाठी अतिशय खास आणि ‘युनिक’ आहे.
नेटकऱ्यांकडून कौतुकाचा वर्षाव
इन्स्टाग्रामवर हा व्हिडिओ शेअर होताच काही तासांतच लाखो लोकांनी तो पाहिला आहे. नेटकरी आजींच्या या धाडसाला सलाम करत आहेत. एका युजरने लिहिलं की, “वय हा केवळ एक आकडा आहे, हे आजींनी सिद्ध केलं.” तर दुसऱ्याने म्हटलं, “खरी प्रेरणा तर हीच आहे, आम्ही तर आतापासूनच थकतो.” या वयात आजींनी दाखवलेली ही ऊर्जा सर्वांसाठीच प्रेरणादायी ठरत आहे.