Pakistani Airstrike :अफगाणिस्तानवर पाकिस्तानचा हवाई हल्ला, 15 जण ठार; मृतांचा आकडा वाढण्याची शक्यता

Pakistani Airstrike : अफगाणिस्तानातून एक मोठी बातमी समोर येत आहे. पाकिटिका प्रांतातील बरमल जिल्ह्यात पाकिस्तानी हवाई हल्ल्यात महिला आणि मुलांसह किमान 15 लोक ठार झाले आहेत. पाकिस्तानचा हा हल्ला 24 डिसेंबरच्या रात्री झाला, ज्यामध्ये सात गावांना लक्ष्य करण्यात आले. या हल्ल्यात एकाच कुटुंबातील पाच जणांचा मृत्यू झालेल्या गावांमध्ये लमण गावाचाही समावेश आहे. वृत्तानुसार, हा हल्ला पाकिस्तानी विमानांनी केला आहे.

पाकिस्तानने या हवाई हल्ल्याला अधिकृत दुजोरा दिला नसला तरी सुरक्षा सूत्रांचे म्हणणे आहे की, हा हल्ला अफगाणिस्तानातील तालिबानच्या तळांवर करण्यात आला आहे. या हल्ल्यात मृतांचा आकडा वाढण्याचीही शक्यता वर्तवली जात आहे.

मिळालेल्या माहितीनुसार, या हल्ल्यामुळे बरमाळच्या मुर्ग बाजार गावात मोठा विध्वंस झाला असून, त्यामुळे मानवतावादी संकट आणखी वाढले आहे. या प्रकरणी स्थानिक अधिकाऱ्यांचे म्हणणे आहे की या हल्ल्यात मोठ्या प्रमाणात नागरिक जखमी झाले असून परिसरात नुकसान झाले आहे. शोध मोहीम सुरू असून मृतांचा आकडा वाढण्याची शक्यता आहे.

तालिबान संरक्षण मंत्रालयाचे निवेदन

या प्रकरणी तालिबानच्या संरक्षण मंत्रालयाने या हल्ल्यांचा तीव्र निषेध केला आहे. मंत्रालयाने जारी केलेल्या निवेदनात म्हटले आहे की, त्यांची जमीन आणि सार्वभौमत्वाचे रक्षण करणे हा त्यांचा कायदेशीर अधिकार आहे. यासोबतच या हल्ल्यात वझिरीस्तानचे निर्वासितही मारले गेल्याचा दावा मंत्रालयाने केला आहे.

आता हल्ल्याच्या कारणाविषयी बोलायचे तर, पाकिस्तान आणि अफगाणिस्तानमधील वाढत्या तणावादरम्यान हा हल्ला झाला. विशेषत: तालिबानी दहशतवाद्यांच्या पाकिस्तानातील उपस्थितीबाबत. या प्रकरणी पाकिस्तानचा आरोप आहे की, अफगाणिस्तानातील तालिबान या दहशतवाद्यांना आश्रय देत आहे, तर अफगाण तालिबानने हा आरोप फेटाळून लावला आहे.