महागाईने होरपळणाऱ्या सर्वसामान्य जनतेला दिवाळीमध्ये खिश्याला चांगलीच कात्री लागणार आहे. ऐन दिवाळीमध्ये एसटी महामंडळाकडून भाडेवाढ करण्याचा निर्णय घेण्यात आला आहे. पेट्रोल-डिझेलनंतर सीएनजीच्या दरात वाढ झाल्यामुळे प्रवास खर्च महाग करण्यात आला आहे. त्यामुळे दिवाळीच्या दहा दिवसांमध्ये 10 टक्के हंगामी तत्त्वावर भाडे वाढवण्याचा निर्णय एसटी महामंडळाने घेतला आहे.
तिकीट दरवाढ 20 ऑक्टोबर मध्यरात्रीपासून 31 ऑक्टोबरपर्यंत लागू करण्यात आली आहे. एसटीने 5 ते 74 रुपयांपर्यंतची दरवाढ केली असून दादर-स्वारगेट मार्गावर सध्या 225 रुपये दर आहे तो या काळात 260 रुपये एवढा असणार आहे. तर शिवशाही गाडीसाठी 350 असलेल्या दरात 385 रुपये इतकी वाढ करण्यात येणार आहे, अशी माहिती एसटी महामंडळाने दिली आहे.
मात्र अतिरिक्त भाडेवाढ शिवनेरी आणि अश्वमेध या बस सेवेला लागू नसणार, असं देखील महामंडळाच्या वतीने सांगण्यात आले आहे.