नितीन नबीन यांच्याकडे भाजपची धुरा! राष्ट्रीय अध्यक्ष म्हणून बिनविरोध निवड; उद्या स्वीकारणार पदभार

नवी दिल्ली: भारतीय जनता पक्षाच्या संघटनात्मक निवडणुकीत आज एक नवा इतिहास रचला गेला आहे. भाजपचे विद्यमान कार्यवाह राष्ट्रीय अध्यक्ष नितीन नबीन यांची पक्षाच्या १२ व्या राष्ट्रीय अध्यक्षपदी बिनविरोध निवड झाली आहे. सोमवारी पार पडलेल्या नामांकन प्रक्रियेत नबीन यांचा एकमेव अर्ज दाखल झाल्याने, पक्षाचे राष्ट्रीय निवडणूक अधिकारी डॉ. के. लक्ष्मण यांनी त्यांच्या निवडीवर शिक्कामोर्तब केले. अवघ्या ४५ व्या वर्षी ही जबाबदारी स्वीकारणारे नितीन नबीन हे भाजपच्या इतिहासातील आजवरचे सर्वात तरुण अध्यक्ष ठरणार आहेत.

लोकशाही प्रक्रियेतून बिनविरोध निवड

सोमवारी दुपारी २ ते ४ या वेळेत अध्यक्षपदासाठी उमेदवारी अर्ज दाखल करण्याची प्रक्रिया पार पडली. यादरम्यान नितीन नबीन यांच्या समर्थनार्थ ३७ नामांकन अर्ज दाखल करण्यात आले होते. या प्रक्रियेत भाजपचे ज्येष्ठ नेते आणि केंद्रीय मंत्री अमित शहा, राजनाथ सिंह, नितीन गडकरी आणि जे. पी. नड्डा प्रामुख्याने उपस्थित होते. ३६ पैकी ३० राज्यांच्या प्रदेशाध्यक्षांची निवड प्रक्रिया पूर्ण झाल्यामुळे ही निवडणूक पार पडली. छाननीनंतर इतर कोणताही उमेदवार रिंगणात नसल्याने नबीन यांची निवड निश्चित झाली.

Press note by Dr K Lakshman , Central Election Officer , Sanghthan Parv announcing that only one name Sri NITIN NABIN has been proposed by all 37 set of proposers drawn from across the country . #SanghathanParv @NitinNabin pic.twitter.com/dCqQagToZp

— B L Santhosh (@blsanthosh) January 19, 2026

तरुण नेतृत्वाचा उदय आणि आव्हाने

बिहारचे वजनदार नेते आणि पाच वेळा आमदार राहिलेले नितीन नबीन यांची ही निवड भाजपमधील ‘जनरेशन शिफ्ट’ मानली जात आहे. जे. पी. नड्डा यांचा कार्यकाळ संपल्यानंतर, पक्षनेतृत्वाने एका तरुण आणि संघटनकौशल्य असलेल्या चेहऱ्याला संधी दिली आहे. नितीन नबीन यांनी यापूर्वी छत्तीसगडचे प्रभारी आणि भारतीय जनता युवा मोर्चाचे राष्ट्रीय सरचिटणीस म्हणून आपली छाप पाडली आहे. आगामी पश्चिम बंगाल, तामिळनाडू आणि आसाममधील विधानसभा निवडणुकांचे त्यांच्यासमोर मोठे आव्हान असणार आहे.

उद्या होणार अधिकृत शपथविधी

नितीन नबीन हे मंगळवारी, २० जानेवारी रोजी सकाळी ११:३० वाजता पक्षाच्या दिल्लीतील मुख्यालयात अधिकृतपणे आपला पदभार स्वीकारतील. या सोहळ्याला पंतप्रधान नरेंद्र मोदी, भाजपचे सर्व मुख्यमंत्री आणि देशभरातील वरिष्ठ पदाधिकारी उपस्थित राहणार आहेत. नबीन यांच्या निवडीमुळे पक्षात नवीन उत्साह संचारला असून, आगामी २०२९ च्या लोकसभा निवडणुकीच्या दृष्टीने पक्षाची बांधणी करणे ही त्यांची प्रमुख जबाबदारी असेल.