न्यूझीलंडविरुद्धच्या तीन सामन्यांच्या टी-20 मालिकेतील पहिल्या सामन्यात भारताला 21 धावांनी पराभव स्वीकारावा लागला आहे. रांचीमध्ये खेळल्या गेलेल्या या सामन्यात भारताचे सर्व फलंदाज किवी गोलंदाजांच्या फिरकीत अडकताना दिसले. पॉवरप्लेच्या पहिल्या तीन षटकांत भारताने पहिल्या तीन विकेट्स गमावल्या. कर्णधार हार्दिक पंड्या (21) आणि उपकर्णधार सूर्यकुमार यादव (47) यांनी आशा उंचावल्या पण तेही संघाला विजयापर्यंत नेऊ शकले नाहीत. यानंतर, अखेरीस वॉशिंग्टन सुंदरने 28 चेंडूत 50 धावांची दमदार खेळी केली, पण ही खेळी भारतासाठी कामी येऊ शकली नाही.
न्यूझीलंडच्या विजयात त्यांचे फिरकीपटू चमकले. त्यांचा कर्णधार मिचेल सँटनरने 4 षटकात केवळ 11 धावा देत 2 बळी घेतले. आणि मायकेल ब्रेसवेलने 4 षटकात 31 धावा देत 2 बळी घेतले. ईश सोधीने 3 षटकात 30 धावा दिल्या, पण सूर्याच्या विकेटनेच सामन्याचे चित्र फिरले. या सामन्यात भारतीय कर्णधार हार्दिक पंड्याने नाणेफेक जिंकून प्रथम गोलंदाजी करण्याचा निर्णय घेतला. 19व्या षटकापर्यंत जवळपास सर्व काही ठीक होते. न्यूझीलंडची धावसंख्या केवळ 149 धावा होती. यानंतर 20व्या षटकात आलेल्या अर्शदीप सिंगने 27 धावा दिल्या आणि न्यूझीलंडची धावसंख्या 176 पर्यंत पोहोचली. डॅरिल मिशेलने 30 चेंडूत 59 धावांची शानदार अर्धशतकी खेळी खेळली. भारतासाठी फिरकीपटूंचेही चांगले योगदान होते. वॉशिंग्टन सुंदरने 4 षटकात केवळ 22 धावा देत 2 बळी घेतले. त्याचवेळी कुलदीप यादव आणि दीपक हुडा यांनीही चांगली गोलंदाजी केली.
A fighting fifty for Washington Sundar, but New Zealand go 1-0 up in the series with a convincing win 👏#INDvNZ | 📝 Scorecard: https://t.co/gq4t6IPNlc pic.twitter.com/3sdxwDRhfJ
— ICC (@ICC) January 27, 2023
एकदिवसीय क्रिकेटमध्ये द्विशतक झळकावल्यानंतर इशान किशन खराब फॉर्ममध्ये दिसत आहे. इथेही त्याने निराशा केली. शुभमन गिलही अपयशी ठरला. नवोदित राहुल त्रिपाठी देखील या सामन्यात काही करू शकला नाही आणि खाते न उघडताच बाद झाला. टीम इंडियाच्या तीन विकेट केवळ 15 धावांवर पडल्या होत्या. यानंतर पंड्या आणि सूर्याने चौथ्या विकेटसाठी 68 धावांची भागीदारी केली. प्रथम खेळताना न्यूझीलंडने 6 बाद 176 धावा केल्या. प्रत्युत्तरात टीम इंडियाला 9 गडी गमावून केवळ 155 धावा करता आल्या.
FIFTY for @Sundarwashi5 🙌🙌
Maiden T20I half-century off 25 deliveries for Washington Sundar.
Live – https://t.co/9Nlw3mU634 #INDvNZ @mastercardindia pic.twitter.com/xtX8fZwOSk
— BCCI (@BCCI) January 27, 2023
भारताकडून आज वॉशिंग्टन सुंदर हा एकमेव यशस्वी खेळाडू ठरला, त्याने पहिल्या गोलंदाजीत 4 षटकांत 22 धावा देऊन दोन बळी घेतले. क्षेत्ररक्षणात त्याने एक चांगला झेलही घेतला. यानंतर त्याने बॅटने 28 चेंडूत दमदार 50 धावा केल्या आणि आपल्या टी-20 कारकिर्दीतील पहिले अर्धशतकही झळकावले. पण त्याची कामगिरी व्यर्थ गेली आणि टीम इंडियाला हा सामना जिंकता आला नाही. आता मालिकेतील दुसरा सामना रविवार, 29 जानेवारी रोजी लखनौच्या अटल बिहारी वाजपेयी स्टेडियमवर खेळवला जाणार आहे.