‘तू लाव टिकली,तू लाव कुंकू’, महिला पत्रकाराचा अपमान केल्याप्रकरणी राष्ट्रवादीच्या नेत्या सुप्रिया सुळे संभाजी भिडेंवर भडकल्या

मुंबई: श्री शिवप्रतिष्ठान हिंदुस्थानचे संस्थापक आणि प्रमुख संभाजी भिडे हे त्यांच्या एका विधानामुळे वादात सापडले आहेत. अलीकडेच संभाजी भिडे यांनी महिला पत्रकाराशी बोलण्यास नकार दिला. कारण महिलेने बिंदी लावली नव्हती. यावरून आता वाद सुरू झाला आहे. संभाजी भिडे यांना महिला आयोगाने नोटीस पाठवली आहे.

यानंतर आता सुप्रिया सुळे यांनीही एका कवितेतून संभाजी भिडेंवर निशाणा साधला आहे. अलीकडेच सुप्रिया सुळे यांनी त्यांच्या सोशल मीडिया अकाऊंटवर हेरंब कुलकर्णी यांची कविता शेअर करून संभाजी भिडे यांच्या वक्तव्यावर निशाणा साधला आहे. या कवितेतून सुप्रिया सुळे यांनी संभाजी भिडेंना सत्य कथन केले आहे.

सुप्रिया सुळेंनी शेअर केली कविता –

तू आणि मी ….?
मी लावतो टिळा
तू लाव टिकली
परंपरेच्या बाजारात
अक्कल आम्ही विकली
मी लावतो भस्म
तू लाव कुंकू
गुलामीचा शंख
दोघे मिळून फुंकू
तू घाल मंगळसूत्र
मी घालतो माळ
मनूने मारलेली रेषा
मनोभावे पाळ
तू घाल बांगड्या
माझ्या हातात गंडा
मुकाट्याने ऐक नाहीतर
आमच्या हातात दंडा
मी घालतो मोजडी
तू जोडवे घाल
सप्तपदी च्या मर्यादेत
जन्मभर चाल
तू घाल अंबाडा
मी शेंडी राखतो
विज्ञानाच्या प्रगतीला
परंपरेने झाकतो
मी घालतो टोपी
तू घाल बुरखा
बायकांच्या गुलामीवर दोन्हीकडे
एकमत आहे बर का…!!!
मी धोतरात, तू शालूत
होऊ परंपरेचे दास
साने गुरुजी ते भिडे गुरुजी
महाराष्ट्राचा प्रवास …..!!!!!