वेस्ट इंडिजविरुद्धच्या तीन सामन्यांच्या टी-20 मालिकेपूर्वी ऑस्ट्रेलियाचा कर्णधार मिचेल मार्शला कोरोनाची लागण झाली आहे. गुरुवारी क्रिकेट ऑस्ट्रेलियाने याला दुजोरा दिला. या मालिकेत मार्श संघाची धुरा सांभाळणार असल्याचे क्रिकेट ऑस्ट्रेलियाने म्हटले आहे. सामन्यादरम्यान त्याला वेगळ्या ड्रेसिंग रूममध्ये ठेवण्यात येणार आहे. यासोबतच तो मैदानावरील खेळाडूंपासून अंतर राखेल.
अष्टपैलू कॅमेरून ग्रीन देखील नुकताच कोरोना पॉझिटिव्ह आला होता. संसर्ग झाल्यानंतरही त्याने वेस्ट इंडिजविरुद्धच्या वनडे मालिकेत भाग घेतला होता.
9 फेब्रुवारीला वेस्ट इंडिजविरुद्ध पहिला टी-20 सामना
कसोटी आणि एकदिवसीय मालिकेनंतर आता तीन सामन्यांच्या टी-20 मालिकेतील पहिला सामना 9 फेब्रुवारी रोजी होबार्टमध्ये खेळवला जाईल. दुसरा सामना 11 फेब्रुवारीला ॲडलेडमध्ये आणि तिसरा सामना 13 फेब्रुवारीला पर्थमध्ये खेळवला जाईल. यापूर्वी 2 कसोटी सामन्यांची मालिका 1-1 अशी बरोबरीत सुटली होती, तर ऑस्ट्रेलियाने तीन सामन्यांच्या वनडे मालिकेत क्लीन स्वीप केला होता.
Despite testing positive for COVID, Mitchell Marsh will lead Australia in the upcoming T20I match against the West Indies#MitchellMarsh #Covid #Australia #Captaincy #T20I #AUSvsWI #WestIndies #SkyFair pic.twitter.com/sbDmwNSKKH
— SkyFair (@SkyFairsports) February 8, 2024
न्यूझीलंडविरुद्ध मिचेल मार्श कर्णधार असेल
वेस्ट इंडिजविरुद्धच्या टी-20 मालिकेनंतर मिचेल मार्शची न्यूझीलंड दौऱ्यावर होणाऱ्या टी-20 मालिकेसाठीही संघाच्या कर्णधारपदी नियुक्ती करण्यात आली आहे. ऑस्ट्रेलियन संघाला 21 फेब्रुवारीला न्यूझीलंडविरुद्ध पहिला टी-20 सामना खेळायचा आहे.
जूनमध्ये होणाऱ्या टी-20 विश्वचषकापूर्वी ऑस्ट्रेलिया संघ वेस्ट इंडिज आणि न्यूझीलंडविरुद्ध 2 मालिका खेळणार आहे. दोन्ही मालिकेत मिचेल मार्श कर्णधार असेल. स्पर्धेपूर्वी संघाची शेवटची मालिका न्यूझीलंडविरुद्ध होणार आहे. अशा स्थितीत विश्वचषकात फक्त मार्शच कांगारू संघाची धुरा सांभाळू शकतो.
2022 च्या विश्वचषकात ऑस्ट्रेलियाचे कर्णधार आरोन फिंच होते. फिंचने आता निवृत्ती घेतली आहे. मार्शला 3 टी-20 सामन्यांमध्ये ऑस्ट्रेलियाचे नेतृत्व करण्याचा अनुभव आहे. त्याने संघाला दक्षिण आफ्रिकेविरुद्धचे तिन्ही टी-20 सामने जिंकून दिले.