स्वप्न शास्त्र आणि मानसशास्त्राच्या मते, आपल्याला पडणारी स्वप्नं ही आपल्या सुप्त मनाचा आरसा असतात. अनेकदा लोकांना लैंगिक संबंधांविषयी (Sex Dreams) स्वप्नं पडतात, पण संकोचामुळे त्याबद्दल कोणी बोलत नाही. अशी स्वप्नं पडणं ही एक नैसर्गिक प्रक्रिया आहे, परंतु त्यांचा अर्थ नेहमीच शारीरिक ओढीशी संबंधित असतो असं नाही.
मानसोपचारतज्ज्ञांच्या मते, तुमच्या सुप्त मनातील काही गुपिते आणि भावना या स्वप्नांमागे दडलेल्या असतात. जाणून घेऊया अशा स्वप्नांचे नेमके अर्थ:
१. स्वप्नात अपरिचित व्यक्ती दिसणे
जर तुम्हाला एखाद्या अनोळखी व्यक्तीसोबत संबंध ठेवतानाचे स्वप्न पडले, तर त्याचा अर्थ असा असू शकतो की तुम्ही तुमच्या आयुष्यात काहीतरी नवीन शोधण्याचा प्रयत्न करत आहात. हे स्वप्न तुमच्यातील दडलेल्या साहसी वृत्तीचे किंवा नवीन अनुभवांच्या इच्छेचे प्रतीक असू शकते.
२. कामाच्या ठिकाणची व्यक्ती किंवा बॉस
अनेकदा लोकांना त्यांच्या ऑफिसमधील सहकाऱ्याबद्दल किंवा बॉससोबत अशी स्वप्नं पडतात. याचा अर्थ असा नाही की तुमचे त्यांच्यावर प्रेम आहे. मानसशास्त्रानुसार, हे स्वप्न त्या व्यक्तीकडे असलेल्या अधिकाराशी किंवा गुणांशी संबंधित असू शकते. तुम्हाला कदाचित त्या व्यक्तीचा आत्मविश्वास किंवा कामाची पद्धत स्वतःमध्ये आत्मसात करायची असते.
३. माजी जोडीदार (Ex-Partner)
माजी जोडीदाराबद्दल स्वप्न पडणे म्हणजे तुम्ही अजूनही त्यांच्या प्रेमात आहात असे नाही. याचा अर्थ असा असू शकतो की, तुमच्या सध्याच्या आयुष्यात किंवा नात्यात तुम्हाला कशाची तरी कमतरता भासत आहे किंवा तुमच्या आयुष्यातील जुना अध्याय पूर्णपणे बंद झालेला नाही.
४. नात्यातील असुरक्षितता
जर स्वप्नात जोडीदार तुम्हाला फसवताना दिसत असेल, तर ते तुमच्या मनातील भीती दर्शवते. तुमच्या खऱ्या आयुष्यातील नात्यात तुम्हाला असुरक्षित वाटत असेल किंवा जोडीदारावरचा विश्वास कमी झाला असेल, तर अशी स्वप्नं पडतात.
५. स्वतःबद्दलचा आत्मविश्वास
काहीवेळा अशी स्वप्नं तुमच्या स्वतःच्या शरीराबद्दलच्या प्रतिमेशी (Self-image) संबंधित असतात. जर तुम्ही स्वतःला स्वप्नात खूप आत्मविश्वासाने वावरताना पाहिले, तर त्याचा अर्थ तुम्ही खऱ्या आयुष्यातही स्वतःवर प्रेम करू लागला आहात.