सांगली – सांगलीतून धक्कादायक घटना समोर येत आहे. येथील एका पाच वर्षांच्या मुलावर बिबट्याने हल्ला करत गंभीर जखमी केले आहे Leopard attacks in Sangli . हल्ला करत त्या मुलाला ओढून घेऊन जाण्याचा प्रयत्न केला मात्र तेथील राहिवाश्यांनी आरडा-ओरड करत बिबट्याचा पाठलाग केला त्यामुळे मुलाचे प्राण वाचले.
सांगली जिल्ह्यातील शिराळा तालुक्यातील तडवळे या गावात ही घटना घडली आहे. या घटनेमुळे आता संपूर्ण परिसरात भीतीचे वातावरण पसरले आहे.
गणेश श्रीराम कांबिलकर असे त्या मुलाचे नाव आहे. मानकुरवाडी, बीड जिल्हा या गावात हा मुलगा राहतो. तडवडे गावात शिवाजी पाटील यांच्या शेतात उस तोडणीचे काम सुरू असताना ऊसाच्या शेतात लपून बसलेल्या बिबट्याने त्या ठिकाणी खेळणाऱ्या गणेशवर झडप घातली.
उसाचे शेत असल्यामुळे बिबट्याला मुलाला पळवणे शक्य झाले नाही. बिबट्याने गणेशला काही अंतरावर टाकून तेथुन पळ काढला. तात्काळ गणेशला सांगलीच्या शासकीय रुग्णालयात दाखल करण्यात आले असून त्याची प्रकृती आता स्थिर आहे.