कन्नड टीव्ही अभिनेत्री चेतना राजचं वयाच्या २१ व्या वर्षी निधन झालं आहे. चेतनाने बंगळुरूच्या एका रुग्णालयामध्ये अखेरचा श्वास घेतला. मिळालेल्या माहितीनुसार तिचं निधन प्लॅस्टिक सर्जरीमुळे झाल्याचं सांगण्यात येत आहे. तिला फॅट फ्री सर्जरीसाठी बंगळुरूच्या एका खासगी रुग्णालयात दाखल करण्यात आलं होतं. त्यानंतर तिची तब्येत अचानक बिघडली. तिच्या फुफ्फुसात पाणी जमा झाल्यामुळे तिचं निधन झाल्याचं बोललं जात आहे.
काही मीडिया रिपोर्टनुसार अभिनेत्रीनं या सर्जरीबाबत तिच्या आई-वडिलांना कोणतीही कल्पना दिली नव्हती. ती तिच्या मैत्रिणींसोबत रुग्णालयामध्ये गेली होती. सर्जरी झाल्यानंतर संध्याकाळी तिला त्रास जाणवू लागला.
तिच्या फुफ्फुसांमध्ये पाणी जमा होऊ लागलं आणि त्यानंतर काही तासांमध्येच तिचा मृत्यू झाला. या घटनेनं तिच्या कुटुंबीयांना मोठा धक्का बसला आहे.