सिंधुदुर्ग – सिंधुदुर्ग जिल्ह्यामधील सह्याद्रीच्या पट्ट्यातील दोडामार्ग तालुक्यातील कळणे मायनिंगमधील उत्खनन पुन्हा सुरु करण्यात आलं आहे. आठ महिन्यांपूर्वी 29 जुलै रोजी कळणे मायनिंगमधील साठवणूक केलेल्या पाण्याचा बांध फुटून कळणे गावामध्ये मोठे नुकसान झाले होते.
शेतकऱ्यांना नुकसान भरपाई देत नाही तोपर्यंत उत्खनन बंद ठेवण्याचे आदेश देण्यात आले होते. परंतु जिल्हा प्रशासनाच्या स्थगितीच्या आदेशाला केराची टोपली दाखवत मायनिंग सुरु करण्यात आलं आहे.
मागील वर्षी जुलै महिन्यात कळणे मायनिंगमधील साठवणूक केलेल्या पाण्याचा बांध फुटला होता. परिणामी कळणे गावात मोठं नुकसान झाले होते. या खनिजयुक्त पाण्याचा वेग एवढा प्रचंड होता की गावातील काजू, नारळ, केळी, सुपारीच्या बागा आणि भातशेती पूर्णत: वाहून गेली होती. जमीन खरवडून गेली.
तर अनेक घरांमध्ये दूषित पाणी शिरल्यामुळे लाखो रुपयांचे नुकसान झाले होते. यावेळी प्रशासनाने पंचनामे करुन एक कोटी 34 लाख रुपयांची नुकसान भरपाई शेतकऱ्यांना देण्याचे आदेश मायनिंग कंपनीला दिले होते. तोपर्यंत कळणेमध्ये होत असलेले मायनिंग बंद ठेवण्याचे आदेश देण्यात आला होता.
मात्र आज आठ महिने होऊन देखील मायनिंग कंपनीकडून शेतकऱ्यांना नुकसान भरपाई देण्यात आली नाही. नुकसान भरपाई मिळण्यासाठी कळणेवासियांनी काही दिवसांपूर्वी प्रांत कार्यालयावर गुराढोरांसह आंदोलनही केले होते. तरी देखील मायनिंग कंपनीकडून नुकसान भरपाई देण्यात आली नाही.
दरम्यान मायनिंग कंपनीच्या लॉबीने महाराष्ट्र सरकारमधील उद्योग मंत्री सुभाष देसाई यांना भेटून मायनिंग सुरु करण्याची परवानगी मिळवल्याचा आरोप इथल्या शेतकऱ्यांकडून करण्यात येत आहे. तर नुकसान भरपाई दिली नाहीतर 1 मे महाराष्ट्र दिनी जिल्हाधिकारी आणि खनिकर्म अधिकाऱ्याच्या कार्यालयाबाहेर आत्मदहन करण्याचा इशारा शेतकऱ्यांनी दिला आहे.