के. एम. पी. युवा कबड्डी सिरीजच्या दुसऱ्या दिवशी दुसऱ्या सामन्यांत अहमदनगर पेरियार पँथर्सने संघाने कोल्हापूर ताडोबा टायगर्सचा पराभव करत स्पर्धेतील दुसरा विजय मिळवला. शिवम पटारेच्या आक्रमक खेळाच्या पुढे कोल्हापूर संघ जास्त वेळ मैदानावर उभा राहू शकला नाही. काही मिनिटांतच कोल्हापूर संघावर लोनची नामुष्की आली. मध्यंतरापूर्वीच शिवम पटारे ने आपला सुपरटेन पूर्ण करत संघाला 23-11 अशी आघाडी मिळवली.
कोल्हापूर ताडोबा टायगर्स संघाचा चढाईपटू तेजस पाटील आज पुन्हा एकदा एकाकी झुंज देत होता. मध्यंतरापर्यत संघाने मिळवलेल्या 11 पैकी 9 गुण एकट्या तेजस पाटीलचे होते. अहमदनगर पेरियार पँथर्सच्या अभिषेक पवारने पुन्हा एकदा हाय फाय पूर्ण करत शिवम पटारेला चांगली साथ दिली.
अहमदनगर संघाने मध्यंतरा नंतरही आपला आक्रमक खेळ करत सामना एकतर्फी केला. अहमदनगर संघाने 45-30 असा विजय मिळवला. शिवम पटारे ने चढाईत 17 गुण तर प्रफुल झावरे एकूण 10 गुण मिळवले. अभिषेक पवार ने 5 यशस्वी पकडी करत संघाच्या विजयात मोलाची भूमिका बजावली. तर कोल्हापूरच्या तेजस पाटीलची आजची 21 गुणांची खेळी संघाला विजय मिळवून देऊ शकली नाही.
बेस्ट रेडर – तेजस पाटील, कोल्हापूर ताडोबा टायगर्स
बेस्ट डिफेंडर – अभिषेक पवार, अहमदनगर पेरियार पँथर्स
कबड्डी का कमाल – शिवम पटारे, अहमदनगर पेरियार पँथर्स