VIRAL: ‘स्प्लिट्सविला’ जोडीचा प्रायव्हेट व्हिडिओ व्हायरल? संतापलेल्या जस्टिन आणि साक्षीने समोर आणलं ‘MMS’ मागचं धक्कादायक सत्य!

मुंबई: मनोरंजन विश्वातील लोकप्रिय रियालिटी शो ‘स्प्लिट्सविला’ फेम जस्टिन डिक्रुस आणि साक्षी श्रीनिवास सध्या एका अत्यंत क्लेशदायक अनुभवातून जात आहेत. नवीन वर्षाच्या सुरुवातीलाच या जोडीचा एक ‘अतरंगी’ व्हिडिओ सोशल मीडियावर वाऱ्यासारखा पसरला असून, तो त्यांचा खासगी ‘MMS’ असल्याचा दावा नेटकऱ्यांकडून केला जात आहे. मात्र, या सर्व प्रकारामुळे संतापलेल्या या जोडीने आता मौन सोडलं असून या व्हायरल व्हिडिओमागचं खरं वास्तव जगासमोर आणलं आहे.

MMS नाही तर ‘व्ह्लॉग’चा भाग; तांत्रिक करामतीचा फटका

सोशल मीडियावर व्हायरल होत असलेला हा व्हिडिओ म्हणजे कोणताही MMS नसून, तो त्यांच्या एका जुन्या व्ह्लॉगचा (Vlog) छोटासा भाग असल्याचं जस्टिन आणि साक्षीने स्पष्ट केलं आहे. कुणीतरी खोडसाळपणे त्यांच्या व्ह्लॉग मधील काही क्षण कापून, त्याला चुकीचं स्वरूप देऊन ‘MMS’ म्हणून इंटरनेटवर पसरवलं आहे. तंत्रज्ञानाचा चुकीचा वापर करून लोकांची दिशाभूल केली जात असल्याचं त्यांनी एका नवीन व्हिडिओद्वारे सांगितलं. “हा कोणत्याही प्रकारचा प्रायव्हेट व्हिडिओ नाही, अफवांना बळी पडू नका,” असं आवाहन त्यांनी आपल्या चाहत्यांना केलं आहे.

“आमचे चांगले व्हिडिओ शेअर करा”; जोडीदारांचा उद्विग्न सवाल

जस्टिन आणि साक्षीने सोशल मीडियावर लाइव्ह येत आपली बाजू मांडली. “जवळपास दीड ते दोन लाख लोकांनी हा व्हिडिओ शेअर केला आहे, हे पाहून आम्हाला खूप वाईट वाटतंय. हे लोक कोणत्या मानसिकतेचे आहेत?” असा सवाल जस्टिनने उपस्थित केला. “आमचे अनेक चांगले व्ह्लॉग्स युट्युबवर आहेत, जे माहितीपूर्ण आणि मनोरंजक आहेत. लोकांनी ते व्हिडिओ शेअर का केले नाहीत? केवळ एका चुकीच्या व्हिडिओला व्हायरल करण्यातच लोकांना रस का असतो?” असा संताप साक्षीने व्यक्त केला आहे.