Vice President Election Result : उपराष्ट्रपतीपदाच्या निवडणुकीत एनडीएचे उमेदवार जगदीप धनखड विजयी झाले आहेत. त्यांनी विरोधी पक्षाच्या उमेदवार काँग्रेस नेत्या मार्गारेट अल्वा यांचा पराभव केला. नवे उपराष्ट्रपती 11 ऑगस्ट रोजी पदाची शपथ घेतील.
मतमोजणी संपल्यानंतर लोकसभेचे सरचिटणीस उत्पल कुमार सिंह यांनी सांगितले की, एनडीएचे उमेदवार जगदीप धनखड 725 पैकी 528 मतांनी विजयी झाले. तर 15 मते अवैध ठरविण्यात आली. उपाध्यक्षपदाच्या निवडणुकीत 34 टीएमसी, 2 भाजप, 2 शिवसेना आणि बसपाच्या एका खासदाराने मतदान केले नाही.
NDA candidate Jagdeep Dhankar declared the Vice President of India pic.twitter.com/SwxtHArqxK
— ANI (@ANI) August 6, 2022
92.94% मतदान झाले
या निवडणुकीत विरोधी उमेदवार मार्गारेट अल्वा यांना 182 मते मिळाली. राज्यसभेचे निवडून आलेले आणि नामनिर्देशित सदस्य आणि लोकसभेचे निवडून आलेले सदस्य अशा एकूण 780 मतदारांपैकी 725 मतदारांनी मतदान केले. एकूण 92.94% मतदान झाले. या निवडणुकीत टीएमसीच्या केवळ दोन खासदारांनी मतदान केले. टीएमसीचे शिशिर अधिकारी आणि दिवेंदू अधिकारी यांनी मतदान केले. भाजपचे संजय धोत्रे प्रकृतीच्या कारणामुळे मतदान करू शकले नाहीत आणि सनी देओल देशाबाहेर आहेत त्यामुळे ते मतदान करू शकले नाही.
नवीन उपराष्ट्रपती निवडीसाठी आज सकाळी 10 वाजता मतदानाला सुरुवात झाली आणि सायंकाळी 5 वाजता संपली. सायंकाळी 6 नंतर मतमोजणीला सुरुवात झाली. मतदान करणाऱ्या पहिल्या नेत्यांमध्ये पंतप्रधान नरेंद्र मोदी यांचा समावेश होता. केंद्रीय मंत्री अमित शहा, राजनाथ सिंह आणि भाजप अध्यक्ष जेपी नड्डा यांनीही मतदान केले. माजी पंतप्रधान डॉ. मनमोहन सिंग व्हील चेअरवर बसून मतदान करण्यासाठी पोहोचले. काँग्रेस नेते राहुल गांधी यांनीही इतर खासदारांव्यतिरिक्त मतदान केले. देशाचे पुढील उपराष्ट्रपती विद्यमान उपराष्ट्रपती एम व्यंकय्या नायडू यांचा कार्यकाळ संपल्यानंतर 11 ऑगस्ट रोजी पदाची शपथ घेतील.