Rohit Sharma Injury Update: मुंबई इंडियन्सवर संकटाचे सावट; ‘हिटमॅन’च्या दुखापतीमुळे डोकेदुखी वाढली, पुढच्या सामन्यात खेळणार की नाही?

आयपीएलच्या १९ व्या हंगामात पाचवेळा जेतेपद भूषवणाऱ्या मुंबई इंडियन्सचा प्रवास सध्या अत्यंत खडतर सुरू आहे. हार्दिक पांड्याच्या नेतृत्वाखाली खेळणाऱ्या या संघाला मैदानावर सलग पराभवाचा सामना करावा लागत असतानाच, आता संघाचा स्टार फलंदाज रोहित शर्मा याच्या दुखापतीमुळे मुंबई इंडियन्सच्या गोटात चिंतेचे वातावरण पसरले आहे. रोहित शर्माला पंजाब किंग्सविरुद्धच्या आगामी सामन्यात खेळता येणार की नाही, याबाबत अद्याप सस्पेन्स कायम आहे.

आरसीबीविरुद्धच्या सामन्यात ओढवली दुखापत

१२ एप्रिल रोजी रॉयल चॅलेंजर्स बेंगळुरूविरुद्ध खेळल्या गेलेल्या सामन्यात रोहित शर्माने फलंदाजीला सुरुवात तर चांगली केली होती. मात्र, १३ चेंडूत १९ धावांवर खेळत असताना त्याच्या हॅमस्ट्रिंगमध्ये (स्नायूंमध्ये) अचानक ओढ जाणवू लागली. फिजिओंच्या मदतीनंतरही वेदना कमी न झाल्याने रोहितने ‘रिटायर्ड हर्ट’ होऊन मैदाबाहेर जाण्याचा निर्णय घेतला. त्यानंतर तो पुन्हा फलंदाजीसाठी येऊ शकला नाही आणि मुंबईला या सामन्यात पराभवाचा सामना करावा लागला.

स्कॅन अहवालाकडे सर्वांचे लक्ष

‘क्रिकबझ’ने दिलेल्या अहवालानुसार, रोहित शर्माच्या दुखापतीची तीव्रता किती आहे, हे तपासण्यासाठी त्याच्या हॅमस्ट्रिंगचे स्कॅन केले जाणार आहे. या स्कॅनचा अहवाल आल्यानंतरच तो १६ एप्रिल रोजी पंजाब किंग्सविरुद्ध वानखेडे स्टेडियमवर होणाऱ्या सामन्यात खेळणार की नाही, याचा अंतिम निर्णय घेतला जाईल. रोहितसारखा अनुभवी खेळाडू संघात नसणे हा मुंबईसाठी मोठा धक्का मानला जात आहे.

हंगामातील कामगिरी आणि गुणतालिकेतील स्थान

रोहित शर्माने या हंगामात आतापर्यंत ४ सामन्यांत १३७ धावा केल्या आहेत, ज्यात कोलकाता नाईट रायडर्सविरुद्धच्या एका अर्धशतकाचा समावेश आहे. मात्र, इतर सामन्यांत त्याचे बॅट शांतच राहिली आहे. दुसरीकडे, मुंबई इंडियन्सने आतापर्यंत ४ पैकी ३ सामने गमावले असून केवळ २ गुणांसह संघ गुणतालिकेत ८ व्या स्थानावर आहे. संघाला पुनरागमन करण्यासाठी विजयाची अत्यंत गरज असताना रोहितच्या दुखापतीमुळे मुंबई इंडियन्ससाठी धोक्याची घंटा वाजली आहे.