IND VS USA: टीम इंडियाने फोडला विजयाचा नारळ, यूएसएचा पराभव करत केला T20 वर्ल्ड कपचा ‘श्रीगणेशा’

टी-२० विश्वचषकाच्या अत्यंत अटीतटीच्या सामन्यात भारतीय संघाने अमेरिकेवर मात करत विजयाची मोहोर उमटवली आहे. मुंबईच्या ऐतिहासिक वानखेडे स्टेडियमवर शनिवारी पार पडलेल्या या सामन्यात भारताची सुरुवात अत्यंत खराब झाली होती, मात्र कर्णधार सूर्यकुमार यादवने आपल्या घरच्या मैदानावर खिंड लढवत भारताला सन्मानजनक धावसंख्या उभारून दिली आणि त्यानंतर गोलंदाजांनी अमेरिकेला रोखून धरले.

पॉवरप्लेमध्ये भारताची दाणादाण

नाणेफेक जिंकून प्रथम फलंदाजी करण्याचा भारताचा निर्णय सुरुवातीला फसला असे वाटत होते. दुसऱ्याच षटकात सलामीवीर अभिषेक शर्मा खातेही न उघडता अली खानच्या चेंडूवर बाद झाला. ईशान किशन (२०) आणि तिलक वर्मा (२५) यांनी ३७ धावांची भागीदारी करून डाव सावरण्याचा प्रयत्न केला, पण ते मोठी खेळी करू शकले नाहीत. शिवम दुबे देखील शून्यावर बाद झाल्याने भारताचे चार मुख्य फलंदाज पॉवरप्लेमध्येच माघारी परतले होते.

शॅडली वान शल्कविकचा भेदक मारा

अमेरिकेच्या शॅडली वान शल्कविकने सहाव्या षटकात भारतीय फलंदाजीचे कंबरडे मोडले. त्याने एकाच षटकात तीन बळी घेत भारताला बॅकफूटवर ढकलले. रिंकू सिंग (६) आणि हार्दिक पांड्या (५) स्वस्तात बाद झाल्याने वानखेडेवर शांतता पसरली होती. अक्षर पटेलने १४ आणि अर्शदीपने ४ धावांचे योगदान दिले, तर वरुण चक्रवर्ती दुर्दैवीरीत्या धावबाद झाला.

कर्णधार सूर्याची ‘विराट’ खेळी

एका बाजूला विकेट्स पडत असताना कर्णधार सूर्यकुमार यादवने मात्र संयम आणि आक्रमकता यांचा सुरेख संगम साधला. सूर्याने ४९ चेंडूत नाबाद ८४ धावांची स्फोटक खेळी केली. त्याच्या या खेळीत मैदानाच्या चहुबाजूंनी मारलेल्या फटक्यांचा समावेश होता. सूर्याच्या या अर्धशतकामुळेच भारताला २० षटकांत ९ गडी गमावून १६१ धावांपर्यंत मजल मारता आली. १६२ धावांच्या आव्हानाचा पाठलाग करताना अमेरिकेचा संघ भारतीय गोलंदाजीसमोर गडगडला आणि भारताने हा सामना खिशात घातला.