भारताचा वेगवान गोलंदाज मोहम्मद शमीला आशिया कपसाठी टीम इंडियामध्ये स्थान मिळालेले नाही. मोहम्मद शमीचे टी-20 क्रिकेटमधील करिअर संपल्याचे मानले जात आहे. ऑस्ट्रेलियन महान खेळाडू रिकी पाँटिंगनेही म्हटले आहे की, टी-20 संघात भारताकडे मोहम्मद शमीपेक्षा चांगले वेगवान गोलंदाज आहेत. पॉन्टिंगने मोहम्मद शमीचे कसोटी क्रिकेटमधील टीम इंडियाचा सर्वोत्तम वेगवान गोलंदाज असे वर्णन केले असले तरी आता टी-20 संघात भारताकडे मोहम्मद शमीपेक्षा चांगले वेगवान गोलंदाज आहेत असं विधान केलं आहे.
भारताने आशिया चषक स्पर्धेसाठी भुवनेश्वर कुमार, आवेश खान आणि अर्शदीप सिंग या तीन स्पेशलिस्ट वेगवान गोलंदाजांची निवड केली आहे, अष्टपैलू हार्दिक पंड्या हा 15 जणांच्या संघात चौथा गोलंदाज आहे. दोन वेळा विश्वचषक जिंकणारा कर्णधार पाँटिंगने आयसीसी रिव्ह्यूमध्ये सांगितले की, “शमी हा भारतासाठी बराच काळ चांगला गोलंदाज आहे. जर तुम्ही त्याची क्षमता पाहिली तर तो कदाचित कसोटी क्रिकेटमधील सर्वोत्तम कामगिरी करणारा आहे.
पॉन्टिंग पुढे म्हणाला, “मला वाटते की भारतीय टी-20 क्रिकेट संघात शमीपेक्षा कितीतरी चांगले वेगवान गोलंदाज आहेत आणि भारताने आशिया चषक स्पर्धेसाठी फक्त तीन जणांची निवड केली आहे. त्यामुळे संघात संभाव्य चार नावे असती तर तो चौथा वेगवान गोलंदाज होऊ शकला असता. जसप्रीत बुमराह आणि हर्षल पटेल दुखापतींमधून बरे होत असल्याने आशिया चषकात नवीन चेंडूची जबाबदारी सोपवण्यासाठी शमीचा समावेश करायला हवा होता, असे अनेकांना वाटते. आशिया चषक 27 ऑगस्ट ते 11 सप्टेंबर या कालावधीत दुबई आणि शारजाह येथे होणार असून पाँटिंगने भारताला स्पर्धेतील प्रबळ दावेदार म्हणून नाव दिले आहे.
पॉन्टिंग म्हणाला, “फक्त आशिया चषकच नव्हे तर कोणत्याही स्पर्धेत भारताला पराभूत करणे नेहमीच कठीण असते, परंतु मला वाटते की प्रत्येक वेळी आपण येऊ घातलेल्या टी-20 विश्वचषकाबद्दल बोलतो आणि त्यातही भारत एक मजबूत संघ असेल. भारतीय संघाची कामगिरी इतर संघांपेक्षा नक्कीच चांगली आहे आणि मला वाटते की भारत आशिया कप जिंकेल.