IND vs ZIM 3rd ODI : टीम इंडियाने तिसर्‍या वनडेत झिम्बाब्वेवर 13 धावांनी केली मात, 3-0 ने जिंकली मालिका

खेळविश्व
By Team Inside Marathi
WhatsApp Group

IND vs ZIM 3rd ODI: भारत आणि झिम्बाब्वे यांच्यातील तीन एकदिवसीय सामन्यांच्या मालिकेतील शेवटचा सामना हरारे स्पोर्ट्स क्लब येथे खेळला गेला, ज्यामध्ये सिकंदर रझा (115) च्या शतकानंतरही भारताने 13 धावांनी हा सामना जिंकला. या विजयानंतर भारताने एकदिवसीय मालिका 3-0 ने आपल्या नावावर केली आहे.

झिम्बाब्वेचा अनुभवी फलंदाज सिकंदर रझा याने या सामन्यात दमदार शतक झळकावले आणि तो संघासाठी विजयाचा सिकंदरही बनणार होता, पण तसे होऊ शकले नाही. भारतीय संघाने मालिकेतील शेवटचा सामना रोमहर्षक पद्धतीने जिंकला. आंतरराष्ट्रीय क्रिकेटमध्ये सिकंदर रझाचे हे 6 सामन्यातले तिसरे शतक आहे, पण तो संघाला विजयाची रेषा ओलांडू शकला नाही.

या सामन्यात शुभमन गिलनेही भारतीय संघाकडून शतक झळकावले. भारतीय संघाचा कर्णधार केएल राहुलने नाणेफेक जिंकून प्रथम फलंदाजीचा निर्णय घेतला आणि 50 षटकात 8 गडी गमावून 289 धावा केल्या. यामध्ये शुभमन गिलच्या 130, इशान किशनच्या 50, शिखर धवनच्या 40 आणि केएल राहुलच्या 30 धावांचा समावेश आहे.

त्याचवेळी झिम्बाब्वेचा संघ 290 धावांच्या लक्ष्याचा पाठलाग करण्यासाठी मैदानात उतरला तेव्हा संघाला चांगली सुरुवात करता आली नाही. मात्र, पाचव्या क्रमांकावर उतरलेल्या सिकंदर रझाने झिम्बाब्वेला विजयाच्या उंबरठ्यावर नेले, पण संघाला या विजयाची सीमा ओलांडता आली नाही. रझाने 115 आणि शॉन विल्यम्सने 45 धावा केल्या. याशिवाय एकही फलंदाज मोठी खेळी खेळू शकला नाही आणि संघ 49.3 षटकांत 275 धावांत गुंडाळला गेला आणि सामना 13 धावांनी गमावला.