IND vs AUS: ऑस्ट्रेलियाविरुद्धच्या टी-20 मालिकेसाठी भारतीय संघ जाहीर, सूर्यकुमार यादव कर्णधारपद भूषवणार

भारत आणि ऑस्ट्रेलिया यांच्यात 23 नोव्हेंबरपासून 5 टी-20 सामन्यांची मालिका खेळवली जाणार आहे. या मालिकेसाठी टीम इंडियाचा संघ जाहीर करण्यात आला आहे.

खेळविश्व
By Team Inside Marathi
WhatsApp Group

India vs Australia: भारतीय क्रिकेट नियामक मंडळाने (BCCI) 23 नोव्हेंबरपासून ऑस्ट्रेलियन क्रिकेट संघाविरुद्ध सुरू होणाऱ्या 5 सामन्यांच्या टी-20 मालिकेसाठी आपला संघ जाहीर केला आहे. ज्यामध्ये रोहित शर्मासह अनेक प्रमुख खेळाडूंना विश्रांती देण्यात आली आहे. सूर्यकुमार यादवला संघाचा कर्णधार बनवण्यात आले आहे, तर ऋतुराज गायकवाड मालिकेतील पहिल्या 3 सामन्यात उपकर्णधार असेल आणि शेवटच्या 2 सामन्यांसाठी श्रेयस अय्यर उपकर्णधार म्हणून उपलब्ध असेल.

सूर्यकुमार यादव पहिल्यांदाच भारताचे नेतृत्व करणार 

सूर्यकुमारने आतापर्यंत कधीही आंतरराष्ट्रीय स्तरावर कर्णधारपद भूषवलेले नाही. वेस्ट इंडिज दौऱ्यावर खेळल्या गेलेल्या 5 सामन्यांच्या टी-20 मालिकेत त्याची संघाचा उपकर्णधार म्हणून निवड करण्यात आली. देशांतर्गत क्रिकेटमध्ये त्याने मुंबईची धुरा सांभाळली आहे. त्याच्या टी-20 आंतरराष्ट्रीय कारकिर्दीत, त्याने आतापर्यंत 53 सामन्यांमध्ये 46.02 च्या सरासरीने आणि 172.70 च्या स्ट्राइक रेटने 1,841 धावा केल्या आहेत. दरम्यान, त्याने 3 शतके आणि 15 अर्धशतके केली आहेत.

संजू सॅमसनला स्थान नाही 

यष्टिरक्षक फलंदाज संजू सॅमसनला आपले स्थान निर्माण करता आलेले नाही. आशियाई क्रीडा स्पर्धेत भाग घेण्यासाठी भारतीय युवा संघातही त्याची निवड झाली नव्हती. या वर्षी ऑगस्टमध्ये वेस्ट इंडिज दौऱ्यावर त्याने शेवटचा टी-20 आंतरराष्ट्रीय सामना खेळला होता. जितेश शर्माची यष्टिरक्षक म्हणून निवड झाली आहे. आशियाई क्रीडा स्पर्धेदरम्यान जितेशने टी-20 आंतरराष्ट्रीय करिअरची सुरुवात केली होती.

या खेळाडूंनाही संधी मिळाली

भारताचा अष्टपैलू खेळाडू अक्षर पटेल याचीही संघात निवड झाली आहे. दुखापतीमुळे तो 2023 च्या एकदिवसीय विश्वचषकात खेळू शकला नाही.
अर्शदीप सिंग, मुकेश कुमार, प्रसिद्ध कृष्णा आणि आवेश खान या चार प्रमुख वेगवान गोलंदाजांना स्थान देण्यात आले आहे. फिरकीपटूंबद्दल बोलायचे झाले तर युवा रवी बिश्नोई संघात कायम आहे. त्याच्याशिवाय वॉशिंग्टन सुंदरच्या रूपाने फिरकी अष्टपैलू खेळाडू आहे.

टी-20 मालिकेसाठी भारताचा संघ 

सूर्यकुमार यादव (कर्णधार), ऋतुराज गायकवाड (उपकर्णधार), इशान किशन, यशस्वी जैस्वाल, टिळक वर्मा, रिंकू सिंग, जितेश शर्मा (यष्टीरक्षक), वॉशिंग्टन सुंदर, अक्षर पटेल, शिवम दुबे, रवी बिश्नोई, अर्शदीप सिंग, प्रशीद कृष्णा, श्रेयस अय्यर, आवेश खान आणि मुकेश कुमार.

मालिकेचे वेळापत्रक

या मालिकेची सुरुवात 23 नोव्हेंबरला विशाखापट्टणम येथे होणाऱ्या टी-20 सामन्याने होणार आहे. यानंतर दुसरा आणि तिसरा सामना 26 नोव्हेंबरला तिरुअनंतपुरममध्ये आणि 28 नोव्हेंबरला गुवाहाटीमध्ये होणार आहे. मालिकेतील शेवटचे 2 सामने 1 डिसेंबर आणि 3 डिसेंबर रोजी खेळवले जातील. चौथा टी-20 नागपुरात तर शेवटचा टी-20 हैदराबादमध्ये खेळवला जाईल. या दोन्ही सामन्यांसाठी अय्यर उपकर्णधार म्हणून भारतीय संघात सामील होणार आहे.