मुंबई : लोकल ट्रेनच्या गर्दीत महिलांना नवीन साडी, ड्रेस घालून अगदी नटून-थटून प्रवास करताना तारेवरची कसरत करावी लागते. ट्रेनमधील असलेल्या गर्दीत काही वेळा साडी तरी खराब होते किंवा मेकअप खराब होतो. महिलांच्या सुविधा लक्षात घेऊन मध्य रेल्वेने 7 स्थानकांवर ‘महिला पावडर रूम’ सुरू करण्याचा निर्णय घेतला आहे. या खोलीत तयार झाल्यानंतर महिलांना मेकअप संबंधित साहित्य खरेदी करता येणार आहे. महिलांसाठी येथे स्वच्छतागृह, वॉश बेसिन, आरसा, टेबलची सुविधा असेल. या सुविधेचा लाभ घेण्यासाठी महिलांना 10 रुपये खर्च करावे लागणार आहेत. रेल्वेने महिलांसाठी वार्षिक योजनाही आणली आहे. 365 रुपये खर्च करून, महिला प्रवासी संपूर्ण वर्षभर या सुविधेचा लाभ घेऊ शकतात. लोकमान्य टिळक टर्मिनस, घाटकोपर, मुलुंड, ठाणे, मानखुर्द आणि चेंबूर या स्थानकांवर ही सुविधा उपलब्ध असेल.
लोकल ट्रेनमधून दररोज लाखो महिला प्रवासी प्रवास करतात. या महिलांच्या सोयीसाठी रेल्वे पावडर रूमची सुविधा सुरू करत आहे. ही सुविधा अनेकदा मॉल्समध्ये उपलब्ध असते.
स्थानक परिसरात पुरेशा सुविधा नसल्याने अनेक वेळा महिलांना जवळच्या मॉल्समध्ये जावे लागते. मात्र आता महिलांना कपडे बदलण्यासाठी आणि तयार होण्यासाठी स्टेशन परिसरातच स्वच्छ खोलीची सुविधा मिळणार आहे. खोलीतील शौचालय वापरण्याची परवानगी फक्त महिलांना असेल. मात्र, पुरुषांनाही तिथल्या दुकानांमध्ये खरेदी करता येणार आहे. मात्र, महिला प्रवासी सोबत असल्यास तिला टेरेस परिसरात बसण्याची परवानगी दिली जाईल.
लेडीज पावडर रूमच्या माध्यमातून रेल्वेने प्रवाशांना केवळ चांगल्या सुविधाच दिल्या नाहीत तर पैसे कमावण्याचा मार्गही शोधला आहे. खोलीच्या देखभाल व संचालनाची जबाबदारी परवानाधारक संस्थेची असेल. रेल्वेच्या म्हणण्यानुसार, या उपक्रमामुळे 5 वर्षांसाठी दरवर्षी 39.48 लाख रुपयांची कमाई अपेक्षित आहे. महिला प्रवाशांना सध्याच्या स्वच्छतागृहांसह विशेष खोल्यांचा पर्याय असेल. प्रवासी त्यांच्या सोयीनुसार निवड करू शकतात. महिला स्वच्छता उत्पादने, कॉस्मेटिक उत्पादने, भेटवस्तू आणि इतर वस्तूंच्या विक्रीला एमआरपीनुसार खोलीत परवानगी असेल. खाद्यपदार्थांच्या विक्री व वितरणास परवानगी दिली जाणार नाही.