रेल्वे प्रवाशांसाठी खुशखबर, वंदे भारतचा प्रवास स्वस्त होणार, सरकार एसी तिकिटांच्या दरात 25% कपात करणार

देशातील करोडो रेल्वे प्रवाशांसाठी एक आनंदाची बातमी आहे. महागड्या भाड्यामुळे ट्रेनमध्ये एसी तिकीट काढता येत नसेल तर आता तसं होणार नाही. सरकार एसी ट्रेनच्या तिकिटांचे भाडे कमी करणार आहे. रेल्वे बोर्डाने शनिवारी एका आदेशात म्हटले आहे की ते एसी गाड्यांमध्ये सवलतीच्या दराची योजना सुरू करण्याचे अधिकार विभागीय रेल्वेला सोपवत आहेत.

अधिकृत प्रसिद्धीपत्रकात म्हटले आहे की, “गाड्यांमधील जागांचा पूर्ण वापर करण्याच्या उद्देशाने, रेल्वे मंत्रालयाने एसी आसन असलेल्या गाड्यांमध्ये सवलतीच्या भाडे योजना लागू करण्यासाठी क्षेत्रीय रेल्वेला सक्षम करण्याचा निर्णय घेतला आहे.” प्रवाशांच्या संख्येनुसार भाडे 25 टक्क्यांपर्यंत कमी केले जाईल.

या गाड्यांमध्ये लाभ मिळेल

रेल्वे बोर्डाच्या आदेशानुसार, ही योजना एसी चेअर कार आणि सर्व एसी सीटिंग ट्रेनच्या एक्झिक्युटिव्ह क्लासमध्ये लागू होईल. यामध्ये अनुभूती आणि विस्टाडोम कोट असलेल्या गाड्यांचा समावेश आहे. प्रवाशांच्या संख्येनुसार त्यांचे भाडे 25 टक्क्यांपर्यंत कमी केले जाईल.

भाडे 25% ने कमी होणार

आदेशात पुढे म्हटले आहे की, ‘मुलभूत भाड्यावर सवलत जास्तीत जास्त 25 टक्क्यांपर्यंत असू शकते. आरक्षण शुल्क, सुपरफास्ट सरचार्ज, जीएसटी यासारखे इतर शुल्क अतिरिक्त आकारले जाऊ शकतात. प्रवाशांच्या संख्येनुसार कोणत्याही वर्गात किंवा सर्व वर्गात सवलत दिली जाऊ शकते. आदेशात म्हटले आहे की, मागील 30 दिवसांमध्ये 50 टक्क्यांपेक्षा कमी जागा असलेल्या वर्गांचा सवलतीच्या भाडे योजनेसाठी विचार केला जाऊ शकतो.

सवलत प्रणाली तातडीने लागू करावी, असे आदेशात म्हटले होते. ज्या प्रवाशांनी आधीच सीट बुक केली आहे त्यांना भाडे परत केले जाणार नाही. सुटी किंवा सणासुदीच्या काळात धावणाऱ्या विशेष गाड्यांवर ही योजना लागू होणार नाही, असे आदेशात स्पष्ट करण्यात आले आहे. या आदेशात असेही म्हटले आहे की, भाड्यात सवलत देण्याचा निर्णय घेताना, स्पर्धात्मक परिवहन पद्धतींचे भाडे विचारात घेतले जाईल.