पंजाबी गायक सिद्धू मूसवाला हत्या प्रकरणात मोठे यश मिळाले आहे. भारताच्या गुप्तचर यंत्रणांच्या सूत्रांनी दिलेल्या माहितीनुसार, सिद्धू मुसेवाला हत्याकांडातील मुख्य आरोपी गोल्डी ब्रारला अटक करण्यात आली आहे. सूत्रांनी दिलेल्या माहितीनुसार, गोल्डी ब्रारला कॅलिफोर्नियातून अटक करण्यात आली आहे. सूत्रांवर विश्वास ठेवायचा झाल्यास, गँगस्टर गोल्डी ब्रारला 20 नोव्हेंबर किंवा त्यापूर्वी कॅलिफोर्नियामध्ये ताब्यात घेण्यात आले आहे. मात्र, गोल्डी ब्रारच्या अटकेबाबत भारत सरकारला कोणतीही अधिकृत माहिती मिळालेली नाही. गँगस्टर गोल्डी ब्रार हा लॉरेन्स बिश्नोईचा जवळचा मानला जातो. गोल्डी ब्रारने सिद्धू मुसेवालाच्या हत्येची जबाबदारी स्वीकारली होती.
सिद्धू मुसेवाला यांचे वडील बलकौर सिंह यांनी गुरुवारी केंद्र सरकारकडे मागणी केली की, त्यांच्या मुलाच्या हत्येचा कट रचणाऱ्याला अटक करण्यात मदत करणाऱ्या माहिती देणाऱ्याला दोन कोटी रुपयांचे बक्षीस जाहीर करावे. जर सरकार अधिक रक्कम देऊ शकत नसेल तर ते आपल्या खिशातून बक्षीस देण्यासही तयार आहेत, असे बलकौर सिंह म्हणाले होते. ते म्हणाले की, मी वचन देतो की जर (सरकार) ही रक्कम देऊ शकत नसेल, तर मला माझी जमीन विकावी लागली तरी मी माझ्या खिशातून पैसे देईन.
नुकतीच इंटरपोलने गोल्डी ब्रारविरोधात रेड कॉर्नर नोटीस जारी केली होती. गोल्डी ब्रारने कॅनडात बसून सिद्धू मुसेवाला यांच्या हत्येचा कट रचला होता. याप्रकरणी दिल्लीतील तिहार तुरुंगात बंद असलेला गँगस्टर लॉरेन्स बिश्नोई याचीही चौकशी सुरू आहे. गोल्डी ब्रार हा लॉरेन्स बिश्नोई यांच्या जवळचा आहे. कॉलेजपासून दोघे एकत्र आहेत. गोल्डी ब्रारवर खून, हत्येचा प्रयत्न, गुन्हेगारी कट आणि शस्त्रास्त्रांची तस्करी असे आरोप आहेत.
मानसातील जवाहरके गावात 29 मे रोजी सिद्धू मुसेवाला यांची हत्या करण्यात आली होती. हत्याकांड घडले तेव्हा मुसेवाला त्यांच्या थार जीपमधून कुठेतरी जात होता. त्यावेळी सहा हल्लेखोरांनी त्यांच्या वाहनाला घेराव घातला आणि गोळीबार सुरू केला. या प्रकरणी चार शूटर्सना अटक करण्यात आली आहे, तर चकमकीत दोन ठार झाले होते.