Samruddhi Highway Accident : समृद्धी हायवेवर अपघातांचं सत्र सुरूच; बसच्या अपघातात 15 जण जखमी

विकासाचा मार्ग म्हणून ओळखल्या जाणाऱ्या समृद्धी महामार्गावर अपघातांचे सत्र सुरुच आहे. गुरुवारी रात्रीच्या सुमारास महामार्गावर पुन्हा एक भीषण अपघात झाला आहे. भरधाव वेगात असलेल्या खासगी बसवरील चालकाचे नियंत्रण सुटल्याने बस थेट महामार्गावरच उलटली. या अपघातात 15 प्रवासी जखमी झाले आहेत.

जखमींना कारंजा येथील रुग्णालयात उपचारासाठी दाखल करण्यात आलंय. काहींची प्रकृती चिंताजनक असल्याचं कळतंय. पोलिसांनी दिलेल्या माहितीनुसार, अपघातग्रस्त बस नागपूर येथून पुण्याच्या दिशेने जात होती.

वाशिमच्या कारंजा तालुक्यातील डोनद लोकेशन 173 जवळ बस आली असता, चालकाचे गाडीवरील नियंत्रण सुटले. काही क्षणातच बस महामार्गावरच उलटली. हा अपघात इतका भीषण होता, की बसचा समोरील भाग अक्षरश: चक्काचूर झाला.

या अपघातात कुठलीही जीवितहानी झाली नाही. मात्र, बसमधील 15 प्रवासी जखमी झाले आहेत. अपघाताची माहिती मिळताच महामार्ग पोलिसांनी घटनास्थळी धाव घेत बचावकार्य सुरू केले. जखमींना कारंजा येथील रुग्णालयात उपचारासाठी दाखल करण्यात आले. जखमींपैकी 5-6 जणांची प्रकृती गंभीर असल्याचं सांगितलं जातंय.