GST On House Rent : तुम्ही भाड्याच्या घरात राहता? आता भरावा लागणार जीएसटी; जाणून घ्या नवीन नियम
नवी दिल्ली : 18 जुलैला जीएसटीच्या संदर्भात लागू करण्यात आलेल्या नवीन मार्गदर्शक तत्त्वांनुसार, घर भाड्याने देण्यावरही जीएसटी (Goods and Services Tax Council | GST) भरावा लागणार आहे. जीएसटी कायद्यांतर्गत नोंदणी केलेल्या लोकांना घर भाड्यावर (Home Rent) 18 टक्के जीएसटी भरावा लागणार आहे. 18 जुलैपासून, जीएसटी कायद्यांतर्गत नोंदणीकृत अशा सर्व भाडेकरूंना घराच्या भाड्यावर 18 टक्के दराने जीएसटी भरावा लागेल. जीएसटी कौन्सिलच्या बैठकीनंतर निश्चित करण्यात आलेला जीएसटी 18 जुलैपासून लागू झाला आहे. (18% GST On House Rent)
नवीन तरतुदींनुसार, आता जीएसटी नोंदणीकृत व्यावसायिकांनी व्यवसाय करण्यासाठी कोणतेही घर भाड्याने घेतल्यास, त्यांना घराच्या भाड्यावर 18 टक्के दराने जीएसटी भरणे बंधनकारक असणार आहे. यापूर्वी केवळ व्यावसायिक मालमत्तेवर जीएसटी आकारला जात होता. कॉर्पोरेट हाऊस किंवा व्यक्तीने निवासी वापरासाठी घर किंवा मालमत्ता भाड्याने घेतली असेल, तर त्यावर जीएसटी लागू होत नव्हता, आता मात्र त्यासाठीही जीएसटी लागू करण्यात येणार आहे. (Govt clarifies GST on house rent)
जीएसटीच्या नवीन तरतुदींनुसार, भाडेकरू जीएसटी कायद्यांतर्गत नोंदणीकृत असेल आणि जीएसटी भरण्यास पात्र असेल तरच घराच्या भाड्यावर जीएसटी भरावा लागणार. त्याचबरोबर घरमालकाला कोणत्याही प्रकारचा जीएसटी भरावा लागणार नाही. याशिवाय जीएसटीमध्ये नोंदणीकृत अशा सर्व व्यक्ती जे भाड्याने घेतलेल्या मालमत्तेतून आपली सेवा देतात त्यांनाही 18 टक्के जीएसटी भरावा लागणार. जर पगारदार किंवा पगारदार व्यक्तीने निवासी घर किंवा घर भाड्याने घेतले तर त्याला जीएसटी भरावा लागणार नाही.