केंद्र सरकारने संसदेत खाद्यतेलाच्या किमतींबाबत मोठा अपडेट दिला आहे. सूर्यफूल तेल, शुद्ध सोयाबीन तेल आणि शुद्ध पामोलिन तेलाच्या किमती गेल्या वर्षभरात लक्षणीयरीत्या खाली आल्याचे सरकारने म्हटले आहे. याअंतर्गत रिफाइंड सूर्यफूल तेल 29 टक्क्यांनी, रिफाइंड सोयाबीन तेल 19 टक्क्यांनी आणि पामोलिन तेल 25 टक्क्यांनी स्वस्त झाले आहे.
सरकारच्या वतीने लोकसभेत दिलेल्या लेखी उत्तरात केंद्र सरकारने उचललेली पावले आणि जागतिक किमतीत सातत्याने होत असलेली घसरण यामुळे खाद्यतेलाच्या किमती खाली आल्याचे सांगण्यात आले आहे. अन्न आणि ग्राहक व्यवहार राज्यमंत्री साध्वी निरंजन ज्योती यांनी लेखी उत्तरात ही माहिती दिली आहे. केंद्र सरकार खाद्यतेलाच्या देशांतर्गत किमतींवर बारकाईने लक्ष ठेवत असल्याचा दावाही त्यांनी केला आहे, जेणेकरून आंतरराष्ट्रीय किमतीतील घसरणीचा फायदा देशातील सर्वसामान्य ग्राहकांना मिळू शकेल.
त्यांच्या लेखी उत्तरात राज्यमंत्री साध्वी निरंजन ज्योती यांनी म्हटले आहे की, किरकोळ किमतींवरील बचतीचे फायदे ग्राहकांपर्यंत पोहोचवण्याचा सरकार सतत प्रयत्न करत आहे. याशिवाय, आंतरराष्ट्रीय किमतीतील कपातीच्या बरोबरीने देशांतर्गत किमती निश्चित करण्यासाठी सरकार उद्योग नेते आणि संस्थांशी चर्चा करत आहे. विशेष म्हणजे, अलिकडच्या वर्षांत, देशांतर्गत किमती कमी करण्यासाठी सरकारने यावरील आयात शुल्क कमी केले आहे.
क्रूड सनफ्लॉवर ऑईल, क्रूड सोयाबीन ऑईल आणि क्रूड पामोलिन ऑईलच्या आंतरराष्ट्रीय किमतीत घसरण झाल्याबरोबरच सरकारने उचललेल्या पावलांमुळे सर्वसामान्य ग्राहकांनी सुटकेचा नि:श्वास सोडला आहे. गेल्या वर्षभरापासून त्यांच्या किमतीत बरीच घट झाली आहे. राज्यमंत्री साध्वी निरंजन ज्योती यांनी सांगितले की, परिष्कृत सूर्यफूल तेल, रिफाइंड सोयाबीन तेल आणि रिफाइंड पामोलिन तेलाच्या किमती अनुक्रमे 29.04 टक्के, 18.98 टक्के आणि 25.43 टक्क्यांनी कमी झाल्या आहेत.