Viral Video: ‘लहरिया कट’ मारला अन् थेट हॉस्पिटल गाठलं! दिल्ली पोलिसांनी शेअर केला तरूणाच्या स्टंटबाजांचा थरार

रस्त्यावर स्टंटबाजी करून स्वतःला ‘हिरो’ समजणाऱ्या तरुणांना आता दिल्ली पोलिसांनी चांगलेच धारेवर धरले आहे. सोशल मीडियावर सध्या एका स्कूटी अपघाताचा अंगावर शहारे आणणारा व्हिडिओ तुफान व्हायरल होत आहे. या व्हिडिओमध्ये दोन तरुण भरधाव वेगात ‘लहरिया कट’ मारण्याच्या नादात भीषण अपघाताचे शिकार झाल्याचे दिसत आहे. रस्ते सुरक्षेचे महत्त्व पटवून देण्यासाठी खुद्द दिल्ली पोलिसांनी हा व्हिडिओ आपल्या अधिकृत हँडलवरून शेअर केला आहे.

ना हेल्मेट, ना सुरक्षेची काळजी

व्हायरल व्हिडिओमध्ये स्पष्टपणे दिसते की, एका स्कूटीवर दोन तरुण स्वार आहेत. आश्चर्याची गोष्ट म्हणजे दोघांच्याही डोक्यावर हेल्मेट नाही. हे तरुण अतिआत्मविश्वासाच्या भरात रहदारीच्या रस्त्यावर स्कूटी वेडीवाकडी पळवत आहेत. कधी डावीकडून तर कधी उजवीकडून नागमोडी वळणे (लहरिया कट) घेत असताना अचानक त्यांचा स्कूटीवरील ताबा सुटला. काही कळण्याच्या आतच स्कूटी रस्त्यावर आदळली आणि दोन्ही तरुण जोरात खाली पडले. हा अपघात इतका भीषण होता की, यात त्यांना गंभीर दुखापत झाल्याची दाट शक्यता वर्तवली जात आहे.

दिल्ली पोलिसांचा थेट सवाल: “असं का करायचं?”

हा व्हिडिओ शेअर करताना दिल्ली पोलिसांनी कॅप्शनमध्ये एक महत्त्वाचा प्रश्न विचारला आहे. त्यांनी लिहिले, “असं का करायचं? सावधगिरीने गाडी चालवा आणि सुरक्षित घरी पोहोचा. निष्काळजीपणा करू नका आणि वाहतूक नियमांचे पालन करा.” अवघ्या १८ सेकंदांच्या या व्हिडिओला आतापर्यंत ३ लाखांहून अधिक व्ह्यूज मिळाले आहेत. तरुणाईला चुकीच्या पद्धतीने स्टंटबाजी करण्यापासून रोखण्यासाठी पोलिसांनी हा ‘धडा’ सोशल मीडियाच्या माध्यमातून दिला आहे.

नेटकऱ्यांचा संताप आणि कारवाईची मागणी

हा व्हिडिओ समोर आल्यानंतर नेटकऱ्यांनी या स्टंटबाजांवर जोरदार टीका केली आहे. एका युजरने संताप व्यक्त करत म्हटले, “अशा लोकांमुळे स्वतःचा तर जीव जातोच, पण समोरच्या निष्पाप लोकांचाही जीव धोक्यात येतो.” दुसऱ्या एका युजरने लिहिले, “स्वतःचा विचार नाही केला तरी किमान आपल्या कुटुंबाचा विचार करायला हवा.” अनेक युजर्सनी दिल्ली पोलिसांना या तरुणांचा शोध घेऊन त्यांच्यावर कडक कायदेशीर कारवाई करण्याची आणि त्यांचे ड्रायव्हिंग लायसन्स रद्द करण्याची मागणी केली आहे.