दिल्ली हादरली! 4 दिवसांच्या चिमुरड्याचे रुग्णालयातून अपहरण; तपासात समोर आलेले सत्य ऐकून पोलीसही चक्रावले

नवी दिल्ली: देशाच्या राजधानीत माणुसकीला काळीमा फासणारी एक घटना समोर आली आहे. रोहिणी भागातील डॉ. बाबासाहेब आंबेडकर (BSA) रुग्णालयातून अवघ्या ४ दिवसांच्या नवजात बालकाचे अपहरण करण्यात आले होते. दिल्ली पोलिसांनी अवघ्या काही तासांत या गुन्ह्याचा छडा लावला असून, या कटामागे मुलाच्या आईची सख्खी मामीच मुख्य सूत्रधार असल्याचे धक्कादायक वास्तव समोर आले आहे. पोलिसांनी याप्रकरणी दोन महिलांना अटक केली असून बाळाची सुखरूप सुटका केली आहे.

नेमकी घटना काय?

३१ डिसेंबर २०२५ रोजी रोहिणी येथील बीएसए रुग्णालयातून एका ४ दिवसांच्या बाळाचे अपहरण झाले होते. वर्षाच्या शेवटच्या दिवशी घडलेल्या या घटनेमुळे रुग्णालयात आणि शहरात मोठी खळबळ उडाली होती. पीडित पालकांनी तात्काळ नॉर्थ रोहिणी पोलीस ठाण्यात तक्रार दाखल केली. घटनेचे गांभीर्य ओळखून पोलिसांनी तातडीने तपास चक्र फिरवली आणि रुग्णालयातील सर्व सीसीटीव्ही फुटेज तपासण्यास सुरुवात केली.

मामीनेच रचला अपहरणाचा कट

रोहिणीचे पोलीस उपायुक्त (DCP) यांनी दिलेल्या माहितीनुसार, या अपहरणाचा कट बाळाच्या आईची मामी सुमन देवी हिने रचला होता. सुमनने आपली मैत्रीण पूजा सोनी ऊर्फ राधा हिच्या मदतीने हे कृत्य केले. ३१ डिसेंबर रोजी सुमनने बाळाला लसीकरण (Vaccination) करायचे आहे, असे सांगून आईच्या ताब्यातून घेतले. त्यानंतर तिने बाहेर दबा धरून बसलेल्या पूजा सोनीच्या हातात बाळ सोपवले.

अस्पताल कर्मचारी असल्याचे भासवून पलायन

बाळाला ताब्यात घेतल्यावर पूजा सोनी हिने आपण रुग्णालयाची कर्मचारी असल्याचे भासवले. बाळाचे वजन करायचे आहे, असा बहाणा करून ती बाळाला घेऊन रुग्णालयातून फरार झाली. जेव्हा बराच वेळ झाला तरी बाळ परत आले नाही, तेव्हा पालकांना संशय आला आणि ही बाब उघडकीस आली. पोलिसांनी सीसीटीव्ही फुटेजच्या मदतीने संशयित महिलांचा माग काढला आणि सुमन देवीच्या घरावर छापा टाकला.

पोलीस तपासात खळबळजनक खुलासा

पोलिसांनी सुमन देवीची कसून चौकशी केली असता तिने आपला गुन्हा कबूल केला. तपासात असे समोर आले की, पूजा सोनी ही रुग्णालयाची कर्मचारी नव्हती, तर सुमनच्या सांगण्यावरून ती तिथे आली होती. प्राथमिक तपासानुसार, कुटुंबातील जुन्या वादातून किंवा रंजिशमधून हे अपहरण केल्याचा संशय पोलिसांना आहे. पोलिसांनी सुमन देवी आणि पूजा सोनी या दोन्ही आरोपींना अटक केली असून बाळाला सुखरूप त्याच्या आई-वडिलांच्या स्वाधीन केले आहे.