सिंधुदुर्ग – श्रावण (ता. मालवण) गावात रविकांत महाजनी यांच्या घराशेजारी एक हिरव्या रंगाचा साप आढळल्यामुळे प्राणीमित्र गोसावी यांना बोलवण्यात आले होते. तेव्हा तो चापड्या जातीचा विषारी साप असल्याचं निष्पन्न झालं. हा साप साधारण २ फूट लांब होता. हा साप महाजनी यांच्या विहिरीजवळील पंपशेडमध्ये एक दिवस होता. एक दिवस होऊनही साप तेथून न गेल्यामुळे महाजन यांनी प्राणीमित्र गोसावी यांना बोलावले.
गोसावी यांनी या सापाला पकडून त्याच्या नैसर्गिक अधिवासात सोडले. याप्रसंगी डॉ. श्रीकृष्ण मगदूम यांनी मदत केली. या सापाबद्धल माहिती देताना गोसावी यांनी सांगितले की, हा साप प्रामुख्याने दाट झाडी असणाऱ्या प्रदेशात राहतो. तो निशाचर असून शक्यतो झाडाझुडपांवर बसलेला आढळतो. बेडूक, सरडे, उंदीर हे त्याचे प्रमुख खाद्य आहे. त्याला इंग्रजीत Bamboo pit viper असं म्हणतात. मराठीत चापड्या किंवा हिरवा घोणस असं म्हणतात.
हा साप फुरश्यांच्या कुळातील असला तरी या सापाच विष घोणस व फुरसे यांच्या विषाप्रमाणे तीव्र नसते. याचा दंश झाल्यास माणसाचा मृत्यू होण्याची शक्यता फार कमी असते. ही प्रजाती सिंधुदुर्गामध्ये प्रामुख्याने सह्याद्री पट्ट्यात आढळते तर इतरत्र फार दुर्मिळ असल्याचे त्यांनी सांगितले.