DA Hike: 1 कोटी केंद्रीय कर्मचारी आणि पेन्शनधारकांची प्रतीक्षा लांबली! मार्च उलटला तरी DA वाढीची घोषणा नाही; कधी मिळणार आनंदाची बातमी?

१ कोटी केंद्रीय कर्मचारी आणि पेन्शनधारकांची प्रतीक्षा लांबली! मार्च उलटला तरी DA वाढीची घोषणा नाही; जाणून घ्या कधी मिळणार आनंदाची बातमी?

नवी दिल्ली: देशातील सुमारे १ कोटी केंद्रीय कर्मचारी आणि पेन्शनधारक सध्या महागाई भत्ता (DA) वाढीच्या घोषणेकडे डोळे लावून बसले आहेत. दरवर्षी सामान्यतः मार्च महिन्यापर्यंत सरकारकडून डीए वाढीची घोषणा केली जाते, मात्र यंदा एप्रिलचा अर्धा महिना उलटूनही अद्याप अधिकृत घोषणा झालेली नाही. यामुळे कर्मचाऱ्यांमध्ये चिंतेचे आणि उत्सुकतेचे वातावरण असून ‘महागाई भत्ता नक्की कधी वाढणार?‘ हा प्रश्न विचारला जात आहे.

किती टक्के वाढ अपेक्षित?

जानेवारी २०२६ पासून लागू होणाऱ्या महागाई भत्त्यात २% ते ३% वाढ होण्याची शक्यता आहे. सध्या केंद्रीय कर्मचाऱ्यांना मूळ वेतनाच्या (Basic Salary) ५८% डीए मिळतो. नव्या वाढीनंतर हा आकडा ६०% ते ६१% च्या आसपास पोहोचू शकतो. ही वाढ ग्राहक किंमत निर्देशांकाच्या (CPI-IW) आकडेवारीवर आधारित असते.

पगारात किती वाढ होणार? (अंदाज)

भत्त्याची टक्केवारी कमी वाटत असली, तरी प्रत्यक्ष पगारावर याचा मोठा परिणाम होणार आहे:

• १८,००० रुपये बेसिक: दरमहा सुमारे ३६० ते ५४० रुपयांची वाढ.

• २९,२०० रुपये बेसिक: ५८४ ते ८७६ रुपयांचा फायदा.

• ५६,१०० रुपये बेसिक: १,१०० रुपयांहून अधिक वाढ.

• २.५ लाख रुपये बेसिक: दरमहा ५,००० ते ७,५०० रुपयांची घसघशीत वाढ.

विलंबाचे नेमके कारण काय?

तज्ज्ञांच्या मते, यंदा होणाऱ्या विलंबामागे कोणतेही राजकीय कारण नसून केवळ प्रशासकीय प्रक्रिया आणि ८ व्या वेतन आयोगाच्या (8th Pay Commission) अंमलबजावणीच्या दिशेने सुरू असलेल्या हालचाली कारणीभूत आहेत. ही केवळ एक तांत्रिक प्रक्रिया असून लवकरच याबाबतचा निर्णय जाहीर होऊ शकतो.

कर्मचाऱ्यांचे नुकसान होणार का?

घोषणा उशिरा झाली तरी कर्मचाऱ्यांचे कोणतेही आर्थिक नुकसान होणार नाही. ही वाढ १ जानेवारी २०२६ पासून पूर्वलक्षी प्रभावाने लागू केली जाईल. त्यामुळे गेल्या चार-पाच महिन्यांचा फरक (Arrears) कर्मचाऱ्यांना त्यांच्या पगारासोबत एकत्रित दिला जाईल. तसेच, बजेटमध्ये वेतन आणि पेन्शनसाठी आधीच तरतूद केल्यामुळे डीए ‘फ्रीज’ होण्याची कोणतीही शक्यता नाही, असे तज्ज्ञांनी स्पष्ट केले आहे.