राज ठाकरेंचा दणका :T20 World Cup मराठीमध्ये पाहता येणार? स्टार स्पोर्ट्सचे अधिकारी राज ठाकरेंच्या भेटीला

यावर्षी ऑस्ट्रेलियात होणाऱ्या टी-20 वर्ल्डकप स्पर्धेचे वेळापत्रक जारी करण्यात आले आहे. सध्या ऑस्ट्रेलियाच विद्यमान टी-20 वर्ल्डकप चॅम्पियन आहे. त्यामुळे, यावर्षी कोण चॅम्पीयन होणार याची सर्वांचाच उत्सुकता लागली आहे. प्रत्येक क्रिकेट विश्वचषक स्पर्धेत कोट्यवधी चाहत्यांना प्रतिक्षा असते, ती म्हणजे भारत-पाकिस्तान या सामन्याची. यावर्षीच्या वर्ल्डकप मध्येही भारत-पाकिस्तान क्रिकेटच्या मैदानात भिडताना दिसणार आहेत. मात्र, यंदा मराठी लोकांसाठी हा वर्ल्डकप अधिक आपलासा राहणार आहे. कारण आता मराठी भाषेतही हे सामने दाखवण्याची दाट शक्यता आहे.

स्टार स्पोर्ट्सवर ज्याप्रकारे इतर भाषांमध्ये सामने दाखवले जातात, तसंच मराठीतूनही सामने दाखवावेत या मागणीसाठी मनेसेने आंदोलनाचा इशारा दिला असून स्टार स्पोर्ट्सला आपल्या भाषेत धडा शिकवण्याचा इशाराही दिला आहे. ज्यानंतर आता स्टार स्पोर्ट्स चॅनेलचे अधिकारी थेट मनसे अध्यक्ष राज ठाकरे यांच्या भेटीला गेले आहेत.