मुंबई: महागाईने होरपळणाऱ्या मुंबईकरांना आता आणखी एक झटका बसला आहे. आता त्यांना म्हशीच्या दुधासाठी जास्त पैसे खर्च करावे लागत आहेत. मुंबई दूध उत्पादक संघाने (एमएमपीए) 1 मार्चपासून शहरातील म्हशीच्या दुधाच्या दरात प्रतिलिटर 5 रुपये वाढ करण्याची घोषणा केली आहे. एका अधिकाऱ्याने शुक्रवारी ही माहिती दिली. एमएमपीएचे अध्यक्ष सी.के. सिंग म्हणाले की, शहरातील 3,000 हून अधिक किरकोळ विक्रेत्यांद्वारे विकल्या जाणार्‍या म्हशीच्या दुधाची किंमत प्रति लिटर 80 रुपये वरून 85 रुपये प्रति लिटर केली जाईल आणि ती 31 ऑगस्टपर्यंत लागू असेल.
सप्टेंबर 2022 नंतरची ही दुसरी मोठी दरवाढ आहे. यापूर्वी म्हशीच्या दुधाची किंमत 75 रुपये प्रतिलिटरवरून 80 रुपये प्रतिलिटर करण्यात आली होती, ज्यामुळे गरीब आणि मध्यमवर्गीय कुटुंबांचे घरगुती बजेट बिघडले होते. गुरुवारी रात्री उशिरा एमएमपीएच्या सर्वसाधारण सभेत एकमताने हा निर्णय घेण्यात आल्याचे सिंग यांनी सांगितले.
अहवालानुसार, मुंबई दररोज 50 लाख लिटरहून अधिक म्हशीचे दूध वापरते. योगायोगाने, या वर्षी फेब्रुवारीमध्ये, महाराष्ट्रातील सर्व प्रमुख गाय दूध उत्पादक संघटनांनी तसेच इतर आघाडीच्या ब्रँडेड उत्पादकांनी गायीच्या दुधाच्या दरात किमान 2 रुपयांची वाढ केली आहे.