आज वर्ल्ड ऑर्गन डोनेशन डे म्हणजेच अवयव दान दिवस आहे. अवयव दान दिवस दरवर्षी 13 ऑगस्टला जगभर साजरा केला जातो. या दिवशी ठिकठिकाणी सेमिनार आणि चर्चासत्रे आयोजित केली जातात. अंगदानाचे महत्त्व समजावले जाते. केवळ महानायक अमिताभ बच्चनच नव्हे, तर अनेक बॉलिवूड सेलिब्रिटींनी याला प्रोत्साहन देण्यासाठी आपले अवयव दान केले आहेत. वर्ल्ड ऑर्गन डोनेशन डे च्या निमित्ताने आम्ही तुम्हाला सांगणार आहोत की, बॉलिवूडपासून साऊथपर्यंत कोणकोणत्या सेलिब्रिटींनी आपले अवयव दान केले आहेत. एका सुपरस्टारने तर मृत्यूनंतर आपली डोळे दान केले, आणि त्यातून प्रेरणा घेऊन अनेक चाहत्यांनी तत्काळ अवयव करण्याची शपथ घेतली.
सर्वप्रथम बोलायचे झाले तर साऊथचे पॉवरस्टार पुनीत राजकुमार यांचा 2021 साली हृदयविकाराच्या झटक्याने मृत्यू झाला. त्यानंतर त्यांच्या कुटुंबीयांनी त्यांचे डोळे दान केले, ज्यामुळे दोन लोकांना प्रकाश मिळाला. त्यानंतर कर्नाटकमधील राजकुमार यांच्या अनेक चाहत्यांनी अवयवदानाचा संकल्प केलेला पाहायला मिळाला.
ऐश्वर्या राय बच्चन हिने अनेक वर्षांपूर्वीच डोळे दान करण्याचा संकल्प केला होता. तिने ‘आय बँक असोसिएशन ऑफ इंडिया’ मार्फत डोळे दान करण्याचा निर्धार व्यक्त केला आहे. तिचे म्हणणे आहे, “माझे डोळे माझी सर्वात मोठी संपत्ती आहेत आणि ते दान करून मी इतरांना पाहण्याची भेट देऊ शकते.” अमिताभ बच्चन यांनीही डोळे आणि इतर अवयव दान करण्याचे वचन दिले आहे. ते अवयव दानाबाबत जनजागृती मोहीम देखील राबवतात, लोकांना प्रेरित करतात. त्यांचे म्हणणे आहे, “एका दानामुळे अनेक जीव वाचू शकतात.”
थलाइवा रजनीकांत हे सुद्धा अवयव करणाऱ्या सेलिब्रिटींच्या यादीत आहेत. त्यांनी संपूर्ण शरीराचे अवयव दान करण्याचा संकल्प केला आहे. रजनीकांत यांच्या मते, “मृत्यूनंतरही सेवा चालू राहिली पाहिजे आणि त्यासाठी हा सर्वोत्तम मार्ग आहे.” ग्लोबल स्टार प्रियंका चोप्रानेही आपले सर्व अवयव दान करण्याचा संकल्प केला आहे. 2014 साली ‘मिस्टर परफेक्शनिस्ट’ आमिर खान यांनीही जाहीर केले होते की ते आपले सर्व अवयव दान करतील.
या यादीत ‘बजरंगी भाईजान’ फेम सलमान खानचेही नाव आहे. सलमानने स्टेम सेल दानाविषयी जागरूकता निर्माण करण्यासाठी आपले अस्थिमज्जा दान करण्याचा संकल्प केला आहे. आर. माधवन यांनी संपूर्ण शरीर दान करण्याचा निर्णय घेतला आहे, तर कमल हासन यांनी डोळ्यांपासून मूत्रपिंडापर्यंत सर्व अवयव दान करण्याचे वचन दिले आहे. त्याचप्रमाणे काजल अग्रवाल यांसारखे अनेक कलाकारही या यादीत आहेत. अभिनेत्री व फिल्ममेकर नंदिता दास यांनी मृत्यूनंतर आपले सर्व अवयव दान करण्याचे वचन दिले आहे. तर जूही चावला यांनीही डोळे दान करण्याचा संकल्प केला आहे.